Pyndep ka Raij Mukhla yei lai thooh ya ki Dieñkhlem ha ka sngi wa ar ka Behdieñkhlam

Ka Lehniam Behdieñkhlam ka Seiñ Raij Mukhla dapoi ko cha ka sngi wa ar ynne ka sngi Mulong heiwa hei step heipor 9:00 waje, ki waheh wa ki khynroo da mih ki na Madan Slot Masi yow lai deiñ ya ki ar tylli ki Dieñkhlam uwi wow pynyieñ ha Tihkhyndaw Wahchnong uwa man u Dieñ Blai katwa uwi won ha Madan Slot Masi Madan Ryngkaw.

Hadien wa da wan deiñ ya kini ki ar tylli ki Dieñkhlam, da lai rah uwi ha Tihkhyndaw i thaw wow pynyieñ ya oo da ki waheh wa lai deiñ, katwa ya uwi won uwa toh ha Madan Slot Masi da lai rah ya oo da ki khon ki paaid ka Niamtre na khloo chirup deiwa emlang u Pa Langdoh, u Sangot, u Maji, u Chutia wa ki Waheh Sankur chirup deilang wa u Wailadmiki Shylla, MLA.

Kamtæ hadien wa da pynpoi ya ki ar tylli ki Dieñkhlam, heipor 3:00 waje won da pynman da ka Dorbar Niam wa da pynlai da u Pa Langdoh Niam ka Seiñ Raij Mukhla, heiwa ha kani ka Dorbar Niam da yoh ya ki kyntien snieñ wei e yumut na ki Waheh Sankur, na u Sangot, u Maji, u Chutia, u Wh. Suna, u Wh. Sari, u Wh. Lyngdoh, u Wh. War, u Wh. Khrong 3 Yung, u Waheh Chnong Mukhla Nongrim, u Waheh Chnong Mukhla Shohshrieh wa u Waheh Shnong Mukhla Umlangshor.

Da jied leh ya ki waheh wa khynroo ki wow tih le tylli ki thlu neibynta wow pynyieñ ya ki le tylli ki Dieñkhlam wei heijooh i por ki wow chna ya ki Chanaroh yow yoh u pynyieñ ya ki Dieñkhlam. Da ya pynbait leh neibynta ka sngi Musiang ka sngi wa le ka Behdieñkhlam kawa man leh ka sngi Chaad Sngi heiwa daw lai li rah ya u Dieñkhlam ka Mukhla Umlangshor, wei hadien wa da wan chaad sngi wei da ye u pynpoi ya u Dieñkhlam ka Mukhla Umlangshor ha Madan Slot Masi, heipor 2:00 waje i sngi daw sdang u pynyieñ ya kini ki 3 tylli ki Dieñkhlam.

Related posts

Sdang ka sngi wa nyngkong ka Lehniam Behdieñkhlam ka Seiñ Raij Mukhla da ka Dorbar Niam

August 28, 2025

Khut sñiawbha ka Seiñ Raij Mukhla cha ka Behdieñkhlam wa ka Yadaw Rong 2025

August 25, 2025

Hadien wa dep pynyieñ ya ki 3 tylli ki Dieñkhlam, neiliang u Pa Langdoh daw pynman biang u ya ka Dorbar Niam ha madan Ryngkaw wow yaklam neibynta ki kaam kiwa yatoh ha ka sngi Muchai ka sngi pynkut ya ka Lehniam Behdieñkhlam ka Seiñ Raij Mukhla.

Manda wai ka Dorbar Niam da yoh i ngooh i dem ya ka Syiem Khlam wa u Ram Shyllong kiwa man ki Blai wa ker wa da ya ki khon ka Seiñ Raij Mukhla wei kamjooh leh ya u Blai Rymkaw Samun.