theme-sticky-logo-alt
theme-logo-alt
Advertisement ad1
Advertisement ad1

Pyndep ka Raij Raliang ya ka lehniam Kopati Puja

Advertisement ad1
Advertisement ad1

Ka lehniam Kopati Puja kawa jooh pynman khlieh snem da ka Raij Raliang ka Elaka Raliang, ha uni u snem ka lehniam da sdang ko ynnin ka 22 wa ynne 23 tarik wei u pyndep ya ka ha i step synyaw ka 24 tarik heiwa daw pyndep ya ki sarin ka lehniam da u Wamon, u Dolloi, u Pator, u Langdoh, u Pamsniñ, ki 7 Waheh, u Harmuid, ki Dhulia, ki Wasan wa u Chutia kiwa pyndep ya ka kñia ka khriam chirup wa ki 5 Langdoh Langpung na ka Raij Langdoh Raliang, ka Raij Niawkmai, ka Raij Ionglang, ka Raij Lapnei, ka Raij Khonchnong ha Khlooblai Puja.

Hadien ka lehniam da pynman sa ka pyrstieh Niam wa pynphooh pynphieñ ki 5 Langdoh na waroh ki San Raij, heijooh i por ki khynroo waheh da pynphooh pynphieñ chooh chooh ki sa ka pyrstieh kynrih ha Madan Khloo Puja wa ka chaad ka put ka tem ha Madan Seiñ Raij Chrah-Umphula na waroh ki dong ki kyntoit yong ka chnong Raliang wa na Nongkynrih, Laskeiñ. 

Advertisement ad1

Ka Kopati Puja toh ka lehniam hadien wa wan ah yow kba kam ka dak wow e ngooh e dem ya u Trekirot uwa booh wa thoo wa e u dei chait dei tram ha waroh ki soo samoi wa da ye u khih u khan u lum u lang ya u khoo u kba, ya ka spah ka phaw, i stat i tip, ha waroh chisnem lynter, kamjooh leh u kyrkhu kyrdoh ya u snem wa daw wan yoh u biang u dap u snem u manai yong ki khon ka Raij ki chnong ki thaw.

Heijooh i por kani ka lehniam leh toh wow engooh ya ka Blai Kopati kamwa da pynjooh na ki por warim. 

Ynne ka sngi kam chibynta yong kani ka lehniam da pyndep ya ka Than Blai ha Yung U Sohblai, da pyndep ya ka Kñia Pomblang ha Khlow Blai ya iwa da pynbood ya i Pastieh ha ini i thaw neitæ won u Sohblai, u Wasan wa ki paidbah da hiar ki cha Ummurem wow pynkai ya u Syntu Blai wei da pynhær leh ya ka Rapati. 

Ha kani ka lehniam Kopati Puja da pynman ya ka yalang yachemlang ki khon ka Raij ha Madan Shrah Umphula Raliang, heiwa u MLA ka thaaiñ u Comingone Ymbon da man u kam i kongsan wei da em i pynyoorong ya ki chaad tynre na ki khon ki Seiñraij na kylleiñ ka Ri-loom Jaiñtia. 

Ha kani ka yalang da yoh ya ki kyntien pdiang burom na u Dolloi ka Elaka, u Chawas Lyngdoh heiwa da khana u kajiak chaphang kani ka lehniam wei da kitbok kitrwiang ya ki khon ka Raij wa ka Elaka yow yoh ki ya i bha liang wanang wei da ngaitskem u wa deiwa pyndep ya kani ka lehniam daw ye u khyllah kyntiñ ya ka kjut khlam COVID-19. 

Ya kani ka yalang yachemlang da wan sakhi ya ka da ki Dolloi na kylleiñ ka Ri-loom Jaiñtia kam u Dolloi ka Elaka Shangpung, Satpator, Amwi, Nongjngi wa kiwi kiwi. 

U Comingone hawa e i klam da ekhublei Kopati Puja u ya ki paidbah heiwa da ong u wa ka West Jaiñtia man ko kawa duna tam kiwa chim tika yada COVID-19 heiwa dang em du 47% donhi kiwa da chim ya ini i dawai heiwa da kyntu u ya kiwa boon wow wan ki chaphrang wow chim ya i tika khnang wow ye u yada ya ka yung ka sem. 

Da ong u leh wa kawon kawon ka niam ym em u hikai ko wow leh ya ki kaam sang tangwa emkaam wow maya wei wow burom ya kiwi ki jait niam. 

Kiwi kiwa da klam ha kani ka sngi kynthup ki ya u Rikut Pareiñ, uwa man kam u Secretary ka Elaka Raliang, u B. Mulieh wa kiwi kiwi. 

Ya ka yalang yachemlang da pynphooh da ki chaad tynre wa ha rukom wa da pynkhreh da ki khon Seiñraij yong ki chnong waphær waphær.

Hadien wa kut ka yalang da mih na madan wow lai cha pchem yung u Sohblai wow pyndep ya ka Pastieh wa kiwi ki bynta yong ka niam. 

Share this:
Previous

Jop ka 7 Wasa ya ka Panaliar ha ka Quarter Final ka 18 Above ka WJDSA

Next

Sñiawdiaw ka ECC yei chah kyrriah kaam u DC ka East Jaiñtia Hills