Ki khon ka Raij Satpator hei yahkhmat ki chakri niam ka Raij kamwa jooh man khlieh-u-snem nadooh ka sngi Thymblein 16 tarik hadooh ka sngi Khyllaw 18 tarik Duyatra da pyndep ki ya ka lehniam Phor wa man ka lehniam wow e ngooh yow Trekirot yei kyrkhu wa da yoh ha chilynter u snem heijooh i por man ko leh ka samoi wow pyndep ki khon ka Raij ya ka niam yong yung neibynta i burom kiwa da khlaad neini na sla khyndaw pyrthai.
Chwa wow sdang kani ka lehniam da em i kbai chnong da ki Wasan neibynta wow tip ki khon ki raiot ka Raij u khreh u tayaar yeiwa emkaam heiyatoh wa kani ka lehniam katwa ha ka sngi khaddooh nadooh i step da sdang ya ka lehniam haman ki thyndai yung hei yahkhmat u Kni deilang ka Kchu ka Siang katwa hei sngi won da em ka chaad ka pastieh wa tip deiwi i kyntien kam ka Chaad Phrok heiwa ki chynrang khamtam ki khon khynroo mih ya chimbynta ki hei riam i bait wa yoo phooh yoo phieñ wei ya kani ka chaad da sdang nyngkong na yung ka Kur Pohdweng neitæ pynbood ha madan Niam Langdung wei pynkut won ha madan Niam Ambir.
Chooh chooh heipor miet won da em ka Chaad Kalang wei ha kani ka chaad da ya chimbynta chongchit da ki khon kynthai khyllood hei riam i bait wa yoo phooh yoo phieñ yoo chongkun chongkhia.
Ha ka yurim i ngait niam ki khon ka Raij Satpator deiwa ye u pyndep ya kani ka lehniam yooluti ki wa ki ha-yung ha-sem næ kiwa maya saya yong ki kiwa da khlaad neini na sla pyrthai kiwa da man kam ki Sangia ha khmat u Trekirot, u Ksan-nia Ksan Chang ki ya ka raij ka chnong, ka yung ka sem kamjooh ya ka pateiñ khon pateiñ ksu kawa da ieh ki chadien.
