Ka Seiñraij Ñiamtre Ummulong ha ka thong wow pynneh pynsah ya ka niam ka rukom, ka dustur riti wa da pynjooh sikai na warim hapoh ka chnong Ummulong, ha ka 2 tarik uni u bnai da pyndep ko ya kawi na ki lehniam namo kñia e ngooh wa chisien san snem ya ki Blai chnong Blai Raij næ ki Blai Ryngkaw.
Ha kani ka step chwa wow mih na Yung Seiñraij da em ka yalang wa tbian hei pynlai u M. Passah, President Seiñraij Ñiamtre Ummulong wei da em i ngooh Blai ngooh Syiem da u khynroo Knermiki Passah wei da yoh leh i klam i pynsñiaw chaphang ki yurim yong kani ka lehniam wa da khana na u Embhah Rymbai, General Secretary Seiñraij Niamtre Ummulong, u Ribiang Laloo kam uwi na ki waheh yong ki Soo Kur wa kamjooh leh na u Dr. H.C. Pakyntein, Sangot Raij Jowai wa man u tymmen u san wow yarap ya ki Kñi yong ki Soo Kur neibynta kani ka leh niam.
Ki khon ka Ñiamtre hapoh ka Seiñraij Ummulong ha kani ka sngi dei sñiawkhia yei man kyrpang kani ka lehniam da wan ya chimbynta ki deiwa kyrmen yooluti leh wa i ye ka Seiñraij Ñiamtre Ummulong u pyndep tikna ya kani ka lehniam katkam ki sarin u man i kyrkhu wa khroo ya ka chnong ka thaw heiwa i miat i bha, i chongsuk chongsaiñ u synchaar i ha ka imlang sahlang yong ki khon ka chnong waroh kawi.
Hei yaklam wa u Ram Shylla uwi na ki waheh wasian ka Seiñraij Ñiamtre Ummulong, da khana u, wa nadooh nachwa nalap ki sngi, ka chnong Ummulong ha ka yurim yong i ngait niam da pynthiah pynchong ko ya kani ka lehniam næ kñia e ngooh neibynta wow pynkhroo yei naam i pyrtuid ki Blai ki Syiem kiwa yieñ yada yakær ya ka chnong ka thaw na ki sih ki roi yong ka pyrthai mariang, kitæ toh Ka Thwai Pynsumkule, Ka Blai Kupli, U Lumtrep Lumskum, U Loomnawania wa u Loomwyrlang wei kamjooh da e kyrpang, da e bhah, e bynta ka chnong leh ha kani ka lehniam næ kñia e ngooh ya ki khlawait ka Elaka Jowai kitæ toh U Tonkha-Buitkha, U Yang wow Bula kiwa man ki khla ka wait ki chah radang hei yaleh pyrchah ya u Syiem ka Hima Malngiang.
Chooh chooh da khana u wa ya kani ka lehniam hakhmat ka duwan kñia da pyndep da ki kñi yong ki Soo Kur kitæ toh u Kñi na ka Kur War, Kur Shylla, Kur Laloo wa ka Kur Kyndiah kiwa man ki kur wa wan chong wan sah nyngkong hapoh ka chnong Ummulong.
