Jowai: Hadien i yoh u yoo u sakhi yei dur i dar yong ka Chaad Sukra ha ki kattu katni tylli ki chnong ki thaw, ha kani wan ka tayaw haka sngi Muchai 17 tarik u Naitung ki khon ka chnong Sabah leh hei pait i pynlai ka Seinraij Sabah dachim ki wow pyndep ya kani ka rukom, dustur chaadkmen chaad sñiawbha hapyrdi i yoophooh yoophein wei miat rang i pyrthai mynder.
U M. Phawa, President Seinriaj Sabah ha ka yalang wa tbian kam u chongknor da e u ki ktien yahkhmat wei yei ngooh i dem da e da siang da uwi na ki khon khynroo ka chnong Sabah katwa ki waheh wasian kiwa da e yei klam i kappe heiyatoh wa kani ka Chaad Sukra nalor u kongsan u D. Langstang, u Dolloi ka Elaka Shangpung, u President Seinraij Tuber u B. Shylla wa u P. Toi.
U P. Toi hei klam da yaroh u ya kiwa yahkhmat ka chnong Sabah kiwa da kitkhia hei wow pynmiat pynyoosuk yei man ka Chaad Sukra hapoh ka chnong ka raij kat nangmih ki snem kamjooh leh i ye yong ki wow pynnneh pynsah yei man kyrpang ka Chaad Sukra deiwa pynemkaam ya ki tiar put tiar tem kiwa ki warim waheh yong ki da pynjooh sikai ki kam ki harmonium, ki clarinet ki thabla, ki chawiang, ka duitara wa kwi kiwi.
U D. Langstang hei e kyntien kam u kongsan, da yaroh u yei stad wei chynna jngai yong ki warim waheh, manchwa longchwa wow pynman ya kani ka samoi chaad kmen chaad sñiawbha chwa wow pynhiar pynhap yow symbe u phiang cha hali pynthor neitæ wan ong chooh chooh u leh hawa kyruin cha kani ka juk katni ka Chaad Sukra man ko leh kyrpang ya ki khynnah skur, ki khynnah puræ heiwa ha kani ka por ka samoi sdang ki u saindur yeiwon yeiwon iwa thymme iwa yatoh wei puræ puthi yong ki. Khaddooh chwa wow chong kyrsu kyntu u Dawhoi ya ki khon ka chnong Sabah deiwa ong kynmoo du i chad i kmen ym pynhun i yei mon i khe u Trekirot iwa kyrpang ha kam kani ka por yaleh u wanrah yei maya saya wei yatylli hapyrdi para khon ka chnong ka Raij.
Ki chaad kiwa da yoh u sakhi ha kani ka Chaad Sukra yong uni u snem ha chnong Sabah toh ki chaad rwai, ki chaad pliang wa kiwi kiwi kiwa da pynkhreh da ki kyntoit wapher, ki manbei wa ki khon khynroo khyllood ka Seinraij Sabah.
Discussion about this post