theme-sticky-logo-alt
theme-logo-alt
Advertisement ad1
Advertisement ad1

Pyndep ka Seng Khihlang ya ka Lympung wa 31 ha chnong Sabah Muswang

Advertisement ad1
Advertisement ad1

Jowai: Ka Lympung wa 31 yong ki khon ka Seng Khasi-Seiñraij ha chnong Sabah Muswang kawa da pait da pynlai da ka Sengkhihlang wei kawa da sdang nadooh ka sngi Musiang 13 u Naitung ha kani ka sngi Pyngkat 15 tarik dapoi ko chawa kut heiwa ki khon ka Niam Khasi-Niamtre wa em hapoh ka bri u Niawtrep-Niawskum dei sñiawsarong yei man kyrpang ka jaitbru dawan ki wow yachimbynta ha ka.

Kam wa khanna parom kajiak, ka bynta wa kyrpang yong kani ka lympung ha ka sngi nyngkong 13 tarik u Naitung toh i lai luti yong ki Moobyna ki Moonaam Moopynyeiñ kiwa da wanrah da ka Sengkhasi Pyndemgumiong, Mairang katwa ha ka sngi wa bood won ka 14 tarik da em i pynkhai pynyieñ ya ki Moonaam Moobynna deilang ka ngooh ka dem ka suit ka choor da ki wasan waheh ka Seng ki Nongshat Nongkhein.

Advertisement ad1

Ha ka sngi khaddooh yong kani ka lympung kawa man ha ka sngi Pyngkat 15 tarik da sakhi wada sdang ya ka da i ngoohblai ngoohsyiem da ki waheh wasian ka Seng ki Nongshat Nongkheiñ hadien neitæ pynbood won i puræ ya ki kyntien kular da waroh kiwa wan ha kani ka Lympung.

U Moly Phawa, President Seiñraij Sabah Muswang neibynta i burom ka Raij ka chnong da yieñ u wow e ki kyntien pdiang burom pynbood wa i khana pynsñiaw ya ki kyntien yahkhmat chaphang ka yurim i lai luti ka Sengkhihlang da u H. Robin Kurbah, President Sengkhihlang katwa yei krehkaam kyllum ka Sengkhihlang da pynsñiaw da u waheh D. Swer, General Secretary Sengkhihlang wei uwa da chim leh ka bynta wow khana, pynsñiaw ha khap u waboon walang wa ka lympung wa 32 u pynman ha chnong Mawngap, East Khasi Hills, ya ka lympung wa 33 u pynman ha chnong Wahiajer, West Jaiñtia Hills ya ka Lympung 34 u pynman ha chnong Tyrsad, East Khasi Hills Katwa ya ka Lympung wa 35 wan u man ko ha chnong Muthlong, East Jaiñtia Hills District.

Ka Dr. Salony hei pynwandur wow klam ya ka phang wa ong “Haba Synjor ka Jingngeit Tynrai Sakma ka Longbriew-Manbriew”, da kdar ko wow booh u dak kylli hakhap u waboon walang, wa i leh man i tynjooh hadooh katni ya ka jaitbru Niawtrep-Niawskum kat cha wa pait wa kyruiñ heiwa ka luti i im miat imbha, i im suk im saiñ wei im tipbru tipblai kat nangmih ki sngi nangjngai i napoh kani ka ri wa maya ka yong-i, ka jubab wa jem tam ha lyndet kini kiyi kiyi toh wa kam ki pateiñ kani ka juk stiñ i pyrkhat i yei man kyrpang ka jaitbru kawa u Blai Trekirot dadep kyrkhu u nadooh nachwa nalap ki sngi yong i wan longbru manbru u khon Niawtrep-Niawskum cheini cha sla khyndaw pyrthai. Kani ka manbei kam wow e bor e mynsiem wei pyn-eh daw pynehrngu ya kani ka juk ka pateiñ, khut kyrsu kyntu ko ya waroh dei wa ong, to khyrngiat yongbru katwa dang biang i por dei wow chim i kitkhlieh wei kitkhia na i daæ samen samen.

U Sadon K. Blah na ka Seng Khasi Nongthymmai Madanrting Pyllun heiklam hajrong ka phang wa ong, “Ka Niam bad ka jinglong rit paid” da pynsñiaw u wa katkam ka riti krehkaam ka ri India ya ka Niam Khasi-Niamtre da toh hok wow tipmit noh ya ka kam kawi na ki niam wa khian paaid hapoh ka ri India næ hapoh ka jylla, yeini da pynsabud u deiwa kdar ya ka yurim i wan longbru manbru ka jaitbru Niawtrep-Niawskum cheini cha sla khyndaw pyrthai katkam ki parom yong u Loom Sohpetbneng, ka tangnoob-tangjri ha ka yurim wow im tipbru-tipblai, tipkur-tipkha wei kamai yei hok.

Chooh chooh uni u waheh hawa kdaar na kawi ka bynta yong i rukom yohnong yoh myntoi ki khon ka Niam Khasi-Niamtre hapoh ka jylla, ong u man i iwa sñiawdiaw sñiaw yaamrem wow tip wa kam ki bru kiwa ksoh-kune yei man kyrpang ka jaitbru hapoh ka jylla dooh i yei yohbhah yohbynta wa kyrpang katwa kiwi tawon kiwa em ha kiwi ki niam, yohnong yohmyntoi ki liang wanang. Uni u waheh da ong u leh ini waroh mih i neidaw iwa ki bor sorkar hapoh ka jylla ym em u chimkhia ki wow pyrkhat neibynta yong-i ki khon ka Niam Khasi-Niamtre kiwa em du chitroh hawa nujor wei man i long yong kiwi ki jait niam hapoh ka jylla næ ka ri India.

Chibynta i pyn sahkynmoo ya kani ka lympung ha kani ka sngi da em leh i pynlait paidbah ya ka thup sah kynmoo yong ka Seng Khihlang da u Acting Dolloi Elaka Shangpung u Chanky Langbang wei da pynkup burom ya ki arngut ki nongmih khmat kiwa kynthup iow u Sniawbhalang Dhar, Transport Minister iong ka Sorkar Jylla wa ya u Waladmiki Shylla, MLA Jowai Constituency.

Da pynchoh pynwyrngia wei pynchongchit chooh chooh ya ki khon ka Niam Khasi-Ñiamtre ha kani ka Lympung da ki chaadrwai, Chaad Pastieh wa kiwi kiwi.

Photos By: Solangki D. Laloo

Share this:
Previous

Khlaad noh u Tbn. Sorkin Dkhar

Next

Nalor i emkaam sa ya ki 10 ngut kiwa sikai, dang em chiboon i duna hapoh ka KNGC