Kawi ka kynthai wa 24 snem i rta na West Khasi Hills da lai thooh dawai ko na Department of Oral and Maxillofacial Surgery (OMFS) yong ka Supercare Hospital, Shillong ha ka 24 tarik u Naichiphaw hadien wa kjut ki ngaab ko namo ki Bilateral Temporo-mandibular Joints (TMJs) i bynta wa pynyabi ya i ngaab wa i khlieh (Lower Jaw Bone to the Skull).
Da ood ko wa chem chitom ko wow kjap u baam wei wow ang i ktien wei wow kjap la kamwa chi snem kattu wei hadien wa leh ya ka MRI da chem wa chitom ko na i kjut Bilateral Degenerative Tm Joint Disease.
Neiliang ki Doctor Oral wa Maxillofacial Surgeon (kiwa man chibynta yong ka OncomaxNE Association) hapoh i yahkhmat ka Dr. Bobby Linda Majaw na Shillong wa u Dr. Ashutosh Vatsyayan na Guwahati da leh ki da ka CAD/CAM Alloplastic Bilateral Temporo-Mandibular Joint Replacement Surgery wa nyngkong dooh ha ka thaaiñ mihsngi ka ri pyn ha Supercare Hospital ,Shillong.
Da phah chna kyrpang ya i chyieñ namo ki Custom Fabricated Implant ha TMJ CONSULTANCY SERVICES ha Bhopal hapoh i yahkhmat u Dr. Darpan Bhargava.
Ini i sumaar (Operation) ya kani ka bru da neh i kamwa 8 kynta. Neiliang u Dr. P S Chakraborty, Co-director ka OncomaxNe uwa dang leh ya ka MSc ha ka Clinical Oncology ha Birmingham, UK da sñiawkmen u hajrong ini i sumaar.
Hadien wa sumaar kani ka bru ym em de u ood kjut ko wei da ye ko wow ang u dait khlem iwon iwon i kjut.
Ya i sumaar da kyrchaan leh da ka MHIS wei ki Doctor wa embynta ha ini kynthup ki ya u Dr. Debashish Borkotoky (OMFS) wa ka Anaesthetists Dr. Sangeeta Kar wa u Dr. Janardhan Bordoloi.
