Ynne ka sngi ka Ephatha Society da pynkup burom (Felicitate) ko ya ki 42 ngut ki khon khynroo khyllod ka East Jaiñtia wa kynthup lang ya kiwa chitom ha ki dkhot met (Differently Abled Persons) kiwa da pyndep ya i chah hikai (Training) ha ka Ephatha Vocational Inclusive Training Centre neibynta i soor wa i sooh i thaiñ sula (Tailoring).
Ha ini i pynkup burom da emlang u Hamlen Rymbai uwa chah khut sñiawbha kam u Honorary Guest, u Starwell Pala uwa man u Functional Manager Commerce and Industries, Khliehriat, ka Sapha Dkhar deilang wa kiwa kitkaam ka Ephatha Society.
Chwa u saam ya ki Certificate, ki Momento wa ki yarap cha kiwa da pyndep ya kani ka Training, da yoh ya i klam wa tbian na u Manager ka Commerce and Industries, Khliehriat heiwa da ong u wa neiliang ka chnat yong oo da kular ko wow krehlang waka Ephatha Vocational Inclusive Training Centre deiwa kyrchaan ya ki yow nang pynboon chooh chooh ya ki jait e sikai hapoh kani ka Centre kam ka chna Furniture, Handicraft wa kiwi kiwi kiwa pynyoh nong ya ki khon khynroo khyllood kamjooh ya kiwa chitom ha ki dkhot met.
Neiliang u Hamlen Rymbai da yaroh u ya u Director ka Training Centre ya i kreh chitom, i maya wa i kitkhlieh wa da pynyoo u cha kiwa chitom ha ki dkhot met kamjooh cha ki khon khynroo khyllood ka East Jaiñtia ki wym pu yoh khih yoh kreh, da kyntu u leh ya kini ki 42 ngut kiwa da dep chah hikai wow pynemkaam hok ki ya i e sikai wa da yoh ki na kani ka Centre, kamjooh da kyntu u ya ki wym hoi hi wot u mylliñ ki ya i bha kani ka Society, da khut u ya ki leh wow e yarap ki cha kani ka Society manda yoh nong ki ha i kaam i kamai yong ki.
Na kini kiwa pyndep yei chah hikai da em 5 ngut kiwa chitom ha ki dkhot met wa 37 ngut ki khynroo khyllood.
Da pynkut ya ka yalang wa tbian da i ngooh Blai na ka Sapha Dkhar kaw na Wapung Skur.
Discussion about this post