15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Pyndep ki khon ka Raij Raliang ya ka Kopati Puja

Advertisement ad1

Jowai: Ka Kopati Puja toh kawi na ki lehniam wada pyndep chisien chisnem hapoh ka Raij Raliang hadien wa dadep i pynlum pynlang ki khon ka chnong ka raij yei yong u kho u kba na hali pynthor wei ya kani ka lehniam da pyndep ha ka yurim wow pynyoo ya i dak i sñiawngooh makhane yei kyrkhu wa da yoh hapoh ka raij ka chnong.

Ha uni u snem ya kani ka lehniam da sdang nadooh ka sngi Khyllaw 25 tarik u Khonchonglad wei da pynkut won ya ka ha ka sngi Musiang 29 tarik yong uni hi u bnai. Hei sakhi ya kani ka lehniam ha ka sngi pynkut, da yoo da chem wa hapyrdi i duna paaid neidaw y wym yohlaad ki khon ka raij wa em ha kiwi chnong wow wan ya chimbynta, ka lehniam man hi ko kawa lai bait lairyntih, yoo chongchit wei yoo phooh yoo phieñ.

Ya ka lehniam dasdang nadooh i por step ha Khloo Blai da u Wamon ka Raij u Monjur Sutnga hapyrdi i emlang u Dolloi u Chawas Lyngdoh, ki Langdoh, ki Waheh Kur wa kiwi kiwi ki chakri niam ka raij wei hadien i pyndep ya ka knia e ngooh ha ka duwan knia wa em ha Khloo Blai da pynbood wan ka Pastieh dei chimbyntalang u Wamon, u Dolloi, ki Langdoh, ki waheh kur wa kiwi ki chakri niam ka raij.

Katwa ka lehniam ha Khloo Blai dang man ko kawa lai chakhmat, iwa yoosuk u sakhi ha kani ka sngi ha chnong Raliang ha ka yung u Dolloi, ki manbei boonkam ki hei ah pachor neibynta wow yoh ki khon ka raij u yabam sñiawbha ha ka sngi wa bood wei da ong leh wa kani man ko chibynta ka dustur wada pynjooh sikai nadooh warim ha kam ini i por.

Hadien i chongngiah wa kattu katni por, ka bynta wabood yong ka lehniam ha kani ka sngi toh i libooh yow Syntu Puja da u Wamon chirrup i synranlang ki khon khynroo ka raij wa ki chakri niam cha i bynta ka wah Um Yurem wei heini i yalai, nadooh wa mih na yung u Wamon tymbut luti wa sñiawchongchit yei ood i thai i sur ki bomm ki ksiñ.

U Wamon man da poi ha i bynta ka Wah Um Yurem, da pyndep u ya ka lehniam dei wa ngam dei dooh i pran ka Wah Um Yurem deilang i ngooh i dem chwa wow pynkai yow Syntu Puja katwa kiwi ki chakri niam da pynlait ki ya ka rapati.

Hei janmiet won, ka bynta wa bood yong ka lehniam Kopati Puja ha kani ka sngi toh ka Pastieh Niam ha yung u Wamon heiwa ya kani ka Pastieh niam dawan sakhilang leh da ki khon ka raij hapyrdi i riam i bait wa yoo phooh yoo phieñ wei chongkun chongkhia. 

Share this:
Previous

Chah thok kawi T. 1.84 lak hawa thied ksaw Online

Next

Pynkup ka KSU-Wapung Unit ya ki 19 ngut da ka Maitshaphrang Academic Award