Ynne ka sngi ka Raij Tuber da pyndep ko yaka lehniam Ku Tyngkong ya u Pator ka Elaka Jowai, u Raymond Nartiang heiwa kani ka lehniam toh kawa chisien chi rta u Pator.
Hei step da yachem chwa ha laad wow lai cha Yung Langdoh kawa em ha Tuber Kmai Chnong, wei u Chutia kamjooh u Waheh Raij da e ki yaka Wyrta ka Chula wow pynbna ya ki khon ka Raij wa daw pyndep ya kani ka lehniam Ku Tyngkong u Pator.
Hadien ini da lai dei kjat cha u Moo Pator wow e ya ka suit ka choor ka ngooh ka dem wei chwa ini da yoh i klam na u Waheh Raij, u Kiang Phawa, i klam na u Pator wa na u Dolloi ka Elaka Jowai, u Puramon Kynjin.
Hawa e yei klam, u Kiang Phawa da kyntu u ya u Pator wow kreh chirup waka Raij wei neiliang u Pator leh da kular u wow leh yeini.
U Dolloi hawa e yei klam da kyntu u wow em i yatylli pyn waroh ki Soo Langdoh hawa krehlang wa u Pator yow wanrah ya i bha i miat.
Hajrong uni u Moo Pator da pyndep ya ka Suit ka Choor wa ka Ngooh ka Dem deiwa pynemkaam ya u sy’iñ, ka dakha wa i pyrnah heiwa da ya chimbynta ha i ngooh i dem da kiwa synraan ya u Pator wa kiwa kitkaam kamjooh ki khon ka Raij Tuber.
Manda dep na Moo Pator da mih ki wow lai sa cha Yung Langdoh wow pyndep yaka lehniam Ku Tyngkong heiwa ha duwan chwa wow psiah da kylli u Langdoh lada da pyndep ya ka niam chwa wow psiah cha Yung Langdoh.
Hadien wa psiah ha pchem wei chwa wow psiah cha Yung Langdoh, ka Langdoh da pynsaitkjat ko ya u Pator wei manda psiah chapoh yung da em i ngooh i dem i suit i choor hei embynta lang ki Soo Langdoh, ki Waheh Raij.
Neiliang u Pator hadien wa pyndep yei ngooh i dem da e sñiawbha u yaka Langdoh da ki that ki nep, kamjooh leh ka yuspong cha u Langdoh.
Hadien ini waroh da em ka yalang wa tbian heiwa da yoh ya ki kyntien sneiñ kyntu na u Dolloi ya ki Soo Langdoh kamjooh kiwa wan sakhi ya kani ka lehniam.
Discussion about this post