Yow pynpsiah hei thij i pyrkhat ki paidbah kammon u man kiwa pynkhreh la jia wan i bor pynjæd pynpra ka rymaw, neiliang ka chnat krehkaam District Disaster Management Authority (DDMA), West Jaiñtia Hills District ynnin ka ka sngi da pyndur wa khai khmi ha Mynthong, Jowai uwa da wanrah leh i oor i haap ki yung wei mynsoo ki paidbah.
Da pynwandur deiwa pynkieh ya ka Siren wa khih u khmi, heiwa ki paidbah da khih khohreh ki u yada ya idæ wei thooh ki leh ya ki thaw rieh wa rap chngaaiñ, neitæ hadien wa rap suki u khmi da mih ki naki yung ki sem, wei li pyntip cha u waheh chnong wa em ki bru wa sahkut haki yung ki sem.
U waheh chnong leh wut wut da phah pynbna chnong u khnang wa ki paidbah wymtoh u tieñ u sorsa ki, tangwa u thooh thaw rieh ki hei thaw wa chngaaiñ, wei heijooh i por leh pyntip paan yarap u naka chnat i chait i khiah kamjooh naka chnat Civil Defense.
Neiliang ki bru ka Civil Defense leh hadien wa dep yachem wa u waheh chnong wut wut da li thooh ki ya ki bru wa mynsoo yow e yarap deilang wa ki Volunteer ka chnong Mynthong.
Kamtæ hadien wa dep sai lut ya waroh ki bru wa mynsoo, neiliang ki Doctor da pynyoh ki ka laad sumaar First Aid katwa ya kiwa mynsoo joor won da pynkit da ka Ambulance cha ki thaw e sumaar wa em chajan.
Hadien wa dep lut ya waroh i emkaam nadooh ki laad yarap ya kiwa mynsoo, wow chim yukheiñ yei jæd i pra, kamtæ u waheh chnong da e khublei u ya waroh kiwa da embynta u yarap ya ka chnong heini i khih khmi.
Kam u pynkynmoo nadooh chwa kani ka sngi leh da em i pynsñiawthooh paidbah neibynta ka chnong Mynthong hajrong kammon u man kiwa pynkhreh la jia wan sakhiat i bor pynjæd pynpra ka rymaw heiwon iwon i por.
Yei klam pynsñiawthooh wa bniah da yoh na ka District Disaster Management Officer, West Jaiñtia Hills, ka D.L. Kharkongor wa na u SI F. Lamare napoh ka chnat Civil Defence, Jowai.
