Na i daw wa da joor sih i long i man ha ka jylla Manipur, neiliang ka sorkar Meghalaya da leh ko waroh iwa ye ko yow lai thooh, yow sai noh ya kiwa lai puræ wa kamjooh kiwi kiwa napoh ka jylla wa em ha Manipur.
Ka sorkar da pynkhreh ko wow pynemkaam da ki lieñsuiñ wa kyrpang yow lai thooh ya 50 ngut kiwa lai puræ ha Agriculture University, 10 ngut ha Food Technology Institute wa 25 ngut ki dkhot ka Lajong Football Team wa kiwi de.
Ka sorkar Meghalaya deiwa ya krehlang wa ka PMO, Ministry of Home Affairs, DG Assam Rifles, Ministry of Civil Aviation wa kiwa pynlai ya ki lieñsuiñ, da leh ki yeiwa emkaam yow pyntikna wa ki bru ka jylla ye ki wow poi dei suk cha ka lieñsuiñ.
Hadooh pyrdi sngi ynne, palat 25 ngut kiwa chong chnong ka jylla da em ki ha ka luti wow liwan cha Meghalaya lyngba ka Guwahati da kiwa boon tylli ki lieñsuiñ. Najrong ki lieñsuiñ da em leh 60 tylli ki Bus ki wow wanrah ya ki khynnah ka Meghalaya.
Ka sorkar Meghalaya da sdang ko leh ya u Helpline neibynta kiwa chong chnong kiwa emkaam yarap wei uni u Helpline Number toh 1800-345-3644, wei kiwa chong chnong ye ki wow pynemkaam ya uni u Number lada emkaam ki iyi iyi.
Chooh chooh ya kiwa lai puræ ha Agriculture and Food Technology ye ki wow yaklam wa u Nodal Officer, u Remdor Dkhar (9863114387) wa u Dr. Paul Chyne (9863089972) neibynta kiwa lai puræ Medical.
Le ngut leh kiwa mihkhmat na Meghalaya wa kynthup ya ka Dr. Ampareen M Lyngdoh, u Daniel Thangkiew (Political Secretary & OSD u Chief Minister) wa u Dr. Viveknanda Singh Rathore, IPS (SP, West Garo Hills) da lai ki cha Imphal yow e yei yarap.
