Pynem burom ka East Jaiñtia ya kiwa sikai ka District ynnin ka sngi

Khliehriat: Ka 5 tarik u Naikhynde toh ka sngi kyrpang yong kiwa sikai ha chityllup ka Ri India kawa yatip i deiwi i kyntien kam ka Teachers’ Day, heiwa ki bor wa pait wa pyllai ka tnat krehkaam i purae puthi wa em ha East Jaiñtia Hills District leh dachim ki wow pynman ka yalang leh burom kyrpang ya ki wa sikai heiwa ha pyrdi i chim bynta ki khynnah skur kani ka sngi daman ko kawa phooh wa phieñ.

Ya i leh burom kyrpang ya kani ka sngi ha East Jaiñtia Hills District da pynman ha Khliehriat Higher Secondary School heiwa nalor ki wa sikai, ki khynnah skur dawan leh wow ya emlang da u Justin Dkhar, Parliamentary Secretary Govt. Of  Meghalaya i/c Education & Social Welfare Department kam u kongsan, u M.S. Lhuid, Deputy Commissioner East Jaiñtia Hills District kam u symbood kongsan, ka V. Lyngdoh, MDC Jaiñtia Hills Autonomous District Council wa kiwi kiwi kiwa chah khut sñiawbha.

Ya ka yalang ha kani ka sngi da pyllai da u N. Rymbai, Asst. Lecturer Jaiñtia Eastern College, ki kyntien yahkhmat hajrong ka thong yong kani ka sngi da e da ka G. Pde, DSEO, East Jaiñtia Hills District, ki kyntien kyrpang heiyatoh wa kani ka sngi da yoh na ka L. Rymbai, Retd, DSEO, Govt. Of Meghalaya katwa ki kyntien khublei won da e da pachat na ka P. Dkhar, SDSEO, Khliehriat.

U Justin Dkhar hei e ya ki kyntien kam u kongsan, e u i sñiawngooh sñiaw burom wakhroo ya ki wa sikai ha kam kani ka sngi neitæ chooh chooh ong u ha oo samen chim u wow pynkyrpang ya ki wa sikai hei im wa man ka sngi i yong-oo. Uni u waheh hei kdar na kawi ka liang yei man kyrpang ki wa sikai ha kini ki sngi wa katni, ong u dap dei diaw i yaamrem wow yoo, u chem wa katni ki sngi hiar dor i tieñ burom ki khynnah ya ki wa sikai, kamtae kyrsu kyntu u ya ki khynnah skur wa ymhoi u man ki kamtæ katwa ye ym ye u pyrchang u yaleh u man ki khynnah kiwa tip u ri syndong yei akor burom nadooh na yung hadooh ha lait. Iwa khaddooh da kyrsu kyntu u ya ki wa sikai wow imsngi chooh chooh ki u krehchitom neibynta i miat i bha ki khynnah kamjooh i miat i bha yong ka imlang sahlang.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Kiwi tawon ki wa da e i klam ha kani ka sngi toh u M.S.Lhuid, Deputy Commissioner East Jaiñtia Hills District, ka V. Lyngdoh, MDC Jaiñtia Hills Autonomous District Council wa ka D. Grace Sutnga, Headmistress Sutnga Govt. Upper Primary School waman kam kawi na ki Awardees napoh ka East Jaiñtia Hills District.

Ki wa sikai kiwa yoh ya ka Teachers Day District Award 2017 napoh ka Easi Jaiñtia Hills District ha uni u snem toh u Wiwotroy Lapasam, Asst. Teacher Rymbai Presbyterian Secondary School,  ka Debony Grace Sutnga, Headmistress Sutnga Govt. UPS  wa ka Diona Syrti, Headteacher Jalaphet Bri Sutnga Govt. LPS.

Nalor kini ha kani ka sngi da em leh i e ya ka Scouts Master- Guides Captain Award 2017 cha ki 2 ngut  ki wa sikai kiwa kynthup yow Scout Master Moonlight Bareh, Asst. Teacher Khliehriat Hr. Secondary School wa ka Guide Captain Biangbhalang Bhoi, Headmistress yong ka Ambrose Memorial Secondary School, Khliehriat.