Ka yalehke kynjatbol kawa da e pyrtuid “Ka 1st 7-A-Side Men’s Niamtre Cup 2026” wa da pynlai da ka Seiñraij Niamtre Ummulong dapoi ko cha wakut ha ka 12-03-2026 da ka yalehke hapyrdi ka Seiñraij Ialong FC pyrchah ya ka Niamtre Paka FC heiwa ka yalehke da man ko kawa yoosuk bha hapyrdi ki arliang.
Ha kani ka sngi da wan wow sakhilang da u Manbha Lyndoh kam u kongsan wa u Rimi Dkhar kam u symbood kongsan.
Ka yalang wa tbian chwa wow sdang ka yalehke da pynlai da u Danny Shylla, Vice President ka Seiñraij Niamtre Ummulong, da e leh yei kyntien pdiang sñiawbha da u President ka Seiñraij Niamtre Ummulong, u Kamwathmupaia Lamare kamjooh ki kyntien maitphang na u General Secretary, u Embhahlang Rymbai katwa ya ki kyntien makhane da e da u Asst. General Secretary, u Rialangki Siangshai.
Chwa wow sdang ka yalehke da yoh yei ngooh i dem na u Knermiki Passah.
U kongsan hei e i klam da yaroh u ya ka Seiñraij Niamtre Ummulong yeiwa ye ko u pynman kam kini ki yalehke ki wow yarap chiboon ya ki khon khynroo wow yoh ki u pynyoo yei sap wa ki em ki kamjooh wow lait ki nei kaam wa sih yong ka pyrthai.
Hadien wa kut ka yalehke, ka Seiñraij Ialong da yoh ko wow rah ya i naam jop ya ka Niamtre Paka FC da 2-1.
Ya i naam Man of the Match da yoh da u Nidaroi Mulieh katwa ya i naam Best Goal da yoh da u Heimon Shylla.
Hadien wa kut ka yalehke da yoh yei kyntien e khublei na u Chermi Shylla heiwa da e khublei u ya waroh ki dhab kiwa da chimbynta ha kani ka yalehke kynjatbol, da e khublei u leh ya kiwa yarap ya ka Seiñraij nadooh kiwa synniang kiwa yarap haka Tournament nadooh ki Referee kamjooh ya ki lok ki jor hi waroh kiwa kyrchaan timun tidiang ya ka Seiñraij Niamtre Ummulong.
Discussion about this post