Hawa yaklam wa u Montri wa pait ya ka chnat i khiah, u Alexander Laloo Hek, da ong u wa ka sorkar da pynhiar ko ya i dor yong i bai Test COVID-19 hapoh ka jylla, deiwa pyntip wa ya ka RT-PCR wa ka CBNAAT da pynhiar cha ka T. 500 chisien Test, katwa ya ka Rapid Antigen Test da pynhiar cha ka T. 250 samen.
Da ong wa ka sorkar da chim ko ya ini i rai wa jhan ha ka yalang wa man hadien i klam u Prime Minister Narendra Modi wa ki Montri Rangbah yong ki jylla. Da ong u wa ini i rai yong ka sorkar toh yow pynboon ya i Test ya kiwa chong chnong neibynta wow yada nei poor yong ka khlam COVID-19.
Da ong u wa ka sorkar da peitbniha bha ko ya i long i man hapoh ka jylla, khamtam hadien wa da sakhi yei ku kiwa chah ktah na ka khlam ha kiwi ki jylla yong ka ri, wa kynthup ha West Bengal, Kerala, Karnataka, Madhya Pradesh wa Maharashtra.
Hawa kylli, u Hek da ong u wa kamwa man katni, ka sorkar ym pu yaklam ko wow pynkrehkaam yaka Lockdown, tangwa da pynmih ya ki kyndon wow yada wei da kyntu joor ya ki paidbah wow bood pynrkhiñ ya ki kyndon.
