Ka sorkar pyrdi da pynhiar ko ya ka dan ka Goods and Services Tax (GST) deiwa pyndooh ya ki soo tylli ki Slab cha ki 2 tylli ki Slab donhi kiwa 5% wa 18%.
Ini daw pynstiñ i ya i khia ki paidbah deiwa pynduna dan ya ki mar wa pynemkaam ha yung, daw myntoi kiwa khayi pateiñ wa khian wei u sdang krehkaam nadooh ka 22 tarik uni u bnai.
Ka Finance Minister, ka Nirmala Sitharaman, da pynbna ko yei pynkylla hadien ka yalang ka GST Council ynnin ka sngi deiwa ong wa boon ki bynta ki wow myntoi wei wow pynsuk yei rukom im ki paidbah wei wow suk u kamai leh.
Chooh chooh ini daw yarap i wow pynneh ya ka poisa ha kti ki paidbah i wow kynjoh chadooh ka Rs. 48,000 klur.
Ki tiar wa emkaam man-ka-sngi kam ki mar baam, ki dawai, ki tiar rep, ki tiar puræ puthi (Education Supplies) wa kiwi u lait ki na ka dan wei kiwa toh dan u man ki du 5%. Hadooh 33 tylli ki dawai (Life-Saving Drug), ki dawai (Anti-Cancer Medicine), ka Health wa Life Insurance u lait ki na ka dan (Tax-Free).
Ki tiar kam ki TV, Air Conditioner wa ki thuk-thuk wa hapoh 350cc kiwa jooh toh dan 28% kattu u toh ki du 18% ka GST. Ki kari khian wa lai da ki Petrol wa khlanbor hadooh 1200cc wa ki kari Diesel hadooh 1500cc leh u toh ki du 18% kiwa nachwa 28%. Ki mar wa syad dor (Luxury items), ki duma, umsoh Carbonated Beverages wa ki kari heh u toh ki hadooh 40% ka dan.
Ki tiar wa pynemkaam man-ka-sngi kam i phñiang sñiooh, sabon, Shampoo, Sauce, Dairy Product wa ki Biscuit u toh ki 5% katwa ki mar baam kam ki ruti (Bread), dud wa paneer u lait ki na ka dan.
Ki tiar ki warep wa ki khynnah leh u lait ki na ka dan.
Ini i pynkylla ya ka GST toh hadien wa yoh yukheiñ wa ka 18% Slab wanrah ko chiboon ka poisa cha ka sorkar na ka GST nadooh u 2017, katwa ka 12% Slab duna bha i pynmih poisa ko.
Deini ka sorkar yooluti ko wa ki paidbah wa kiwa khayi khian u myntoi bha ki.
Discussion about this post