Jowai: Ynne man ko ka sngi kawa 32 wa da krehkaam ka Lockdown ha waroh kawi ka ri wow yakhun ya ka khlam u COVID-19 wei hanlada pynyinsur ya kani ka khang chnong tangwa dang khang hi leh ya i lai i wan hapyrdi ki jylla wa ki district.
Nadooh wa sdang ya i khang wow lai u wan, ki pulit da yieñ sonteri ki ya ki sarok ha kylleiñ ki chnong ki thaw.
Ha ki ar district ka ri loom Jaiñtia (East Jaiñtia wa West Jaiñtia) ki pulit dang pynjoor ki sonteri.
Da sakhi wa ha Tuber Chohchrieh, ki pulit da chim ki yei pyrtuid wa ki Number ki truck wa lai wa wan wei da chondur leh ya ki kari khian kiwa psiah chapoh ka District.
Hawa yaklam wa u SP ka East Jaiñtia, u Vivekanand Singh Rathore da pyntip u wa neidaw wa man ka District wa man ko ha khappood da pynjoor ya i sonteri wa i sylli (screening) ha Ratacherra heiwa da em leh ki bru na ka chnat i chait i khiah wa ki Magistrate wei da chim leh ya ki pyrtuid ki bru wa wan na baar.
Da pyntip u wa da sylli ya ki kari ha Umkiang, Sunapur, Lumchnong, Umtyra, Lad Sutnga, Tuber Chohchrieh wa kiwi kiwi heiwa da em pulit 24 kynta.
Ha West Jaiñta Hills leh da pynjoor ya i sonteri wa i sylli ha ki thaw wa boon ha ki sarokbah wa kiwi kiwi ki thaw.
Discussion about this post