Kiwa Bat ka Meghalaya nakhmat dooh kitæ u Kishan Lyngdoh wa u Guest Player u Chirag Khurana da Bat ki khlem haap yow pynrem ya ka Tripura da 10 Wicket haka Syed Mushtaq Ali Trophy T20 Tournament wa pynman ha Mangalagiri, Andhra Pradesh ynne ka sngi.
Deiwa kdong ya 147 Run yow jop, ka Meghalaya da poi thong ko hawa kut ka Over wa 18. Wei ini da man ko leh ka ya kamai lang wa heh dooh da kiwon kiwon ki arngut ya ka Meghalaya ha ka Syed Mushtaq Ali Trophy, deiwa tam ya ka 120 Run wa kamai lang u Yogesh Tiwari wa u Punit Bisht pyrchah ya ka Mizoram ha ka samoi yalehke 2020-21.
U Kishan Lyngdoh uwa man leh uwa yalehke ka East Jaiñtia Hills District, da kamai u 85 Run na ki 62 bol deiwa dat ya 7 tylli ki 4 Run wa 3 tylli ki 6 Run. U Khurana won da kamai u wer wer heiwa da yoh u 54 Run na ki 47 bol.
Kani toh ka 50 Run wa ar u Lyngdoh heiwa da yoh u 52 Run pyrchah ya ka Mizoram ha ka tayaw wa dep.
Hachwa ini, u Khurana da ka bol da yoh u wow pynhaap ya waroh ar kiwa Bat nyngkong heiwa ka Tripura da kamai ko 146 Run deiwa haap lut ki Wicket. U Khurana da yoh u 2/21, u Akash Kumar Choudhary 2/24, u Dippu Sangma 1/36 wa u Chengkam Sangma 1/37 wei da em leh 4 tylli ki Run Out.
Ka Meghalaya daw yaleh ko ya ka yalehke wa khaddooh pyrchah ya ka Arunachal Pradesh mynstep.
