15 49.0138 8.38624 1 1 4000 1 https://wyrta.com 300 0

Pynkhai im biang ka KSU ya ka Bakur-Dawki Unit

0 Comments

Jowai: Ka Khasi Students Union-War Jaintia Circle ha ka 6 tarik uni u bnai da chimbynta ko wow pynkhlan ya i krehkaam yong ka seiñ deiwa pynkhai im biang ya ka KSU Bakur–Dawki Unit lyngba i thung ya kiwa kitkaam wa thymme yong ka.

Kiwa kitkaam wa thymme kynthup ki ya u President u Standy Khongnoh, Secretary u Simon Kharwan, Organising Secretary u Dapmon Khonglah, Sports Secretary u Marshal Tongper, Education Secretary u Teibor Khonglam, Publicity Secretary u Raj Khongnoh wa 6 ngut ki dkhot yong ka Unit. Ka seiñ katkam ka riti krehkaam yong ka, da pynbaam smai ko leh ya kiwa dang chah jied da u President ka seiñbei u Lambokstar Marngar hei emlang u Manly Nongpluh Finance Secretary seiñbei, u Johnson Nongkhlaw Organising Secretary Laban Circle, u Ohibait Dkhar President Jaintia Hills District Unit, u Laitphar Syngkrem President War Jaintia Circle wa kiwi de kiwa yahkhmat napoh ri-loom Jaiñtia.

Ha kani ka yalang da kynmoo warom ya u (L) Pius Khonglah wa u (L) Fairshall Kongwang ki dkhot warim ka seiñ kiwa da leh chiboon ki kaam wa bha.

Ha ka tai ka sngi da yoh yei klam na u Johnson Nongkhlaw uwa da pyn-eh bok eh nasib ya ka Bakur- Dawki Unit yow ye ko u kreh neibynta ka seiñ. Da yoh leh yei klam na u Ohibait Dkhar uwa ong wa ka KSU man ko kam ka skur bah yong ka jaitbru wei hapoh ka KSU ym em itæ i sñiaw yapher wei man ki ka wi. Da yoh leh yei klam na u Manly Nongpluh heiyatoh wa u pood u ang khamtam ka Bakur–Dawki kawa man ka thaaiñ khappood deiwa ong wa emkaam wow yada ya u pood yong i wei ym e laad ya kiwa ym toh ki tre ri wow psiah ki chapoh u Bri u Ynñiawtrep.

Neiliang u President ka seiñbei u Lambokstar Marngar da kynmoo tympang u ya ki ar ngut ki dkhot ka seiñ kiwa da dooh noh ka seiñ kiwa jooh kreh chongchit, wei da batai tbian u yei lai luti ka seiñ la soophaw snem tam katni.

Da ong u leh wa hawa em hapoh ka seiñ toh u man i kiwa syndong yow lait na ki chah pynbaad, em kiwa boon wa kwah u put turoi kammon wow pynbood naam ya ka KSU wei na ini i daw toh u man i kiwa syndong wa em ki jaitbru wa pynchoi. Ka KSU ym toh du ki bru na sor wei katwa phi dang man phi ki dkhot yong ka jaitbru man phi leh ki dkhot ka KSU.

Ini toh katkam ka kyrwoh wa phah da u Lurman B. Talang, General Secretary KSU War Jaintia Circle.

Advertisement ad1

0 Comments

Leave a Reply