Jowai : Ka Ophis yong u Deputy Commissioner West Jaintia Hills hei krehlang wa ka ophis yong ka SDO Civil Amlarem Subdivision da pynman ki ya ka Chief Minister Youth for Green Campaign deiwa pynkhooid ya ka wah Myngkjai kawa em harood u surok na Jowai cha Amlrem.
Nalor ki wakreh ki ophis sorkar wa kynthup ya ka Jowai Municipal Board, da ya chimbynta chongchit ha kani ka pynkhooid wah da ki nongchong chnong yong ki san tylli ki chnong; kitæ toh ka Pynthor Langteiñ, ka Mustem, Moopyut, Moophlang wa ka Umsalang.
Da wan chimbynta leh ha kani ka pynkhooid ya ka wah Myngkjai da ki khynnah skur na kini ki san tylli ki chnong kiwa kynthup ya ka Pynthorlangteiñ UP School, ka Moopyut UP School, ka Mustem UP School, ka Umshangiar DCLP School Mustem, ka Dong Nongpluh LP School Mustem wa ka Dong Wahkhah UP School Mustem East.
Hachwa wow sdang ya ka pynkhooid ya ka wah, da pynman ya ka yalang kawa pyllai da ka B. Blah EAC. Da yoh yei klam pdiang sniawbha na u Election Officer Bantei Kharshandi, i klam lamphrang na ka SDO (Civil) ka kong I. Laloo wei da yoh leh yei klam na u Rangbah chnong ka Pynthor Langteiñ u A. Lypon, u Secretary ka chnong Muphlang u I. Shylla wa u ADM, SC Laloo wa wai leh ya kani ka pynkhooid ya ka wah Myngkjai.
Discussion about this post