Kiwa chongdai ha Jowai wa kynthup ha Yaaw Chor, ka Yaaw Seiñ Raij Jowai wa ka Yaaw Chyiap ha chirup deilang kiwa em dukan ha ki yung Building yong ki bru samen ha i bynta ka Iawmusiang, da ya mih chimbyntalang ki hei pynkhooid ya ki dukan dukdoh yong ki ha ka 20 tarik uni u bnai.
Ya kani ka pynkhooid yaw da yahkhmat da ka chnat Commissionerate of Food Safety hei pait i pynlai ka Deputy Commissioner (Enforcement) ka BDS Mukhim.
Da chimbynta leh ha ini i pynkhooid yaaw kamwa 200 ngut ki NCC Cadet na 9 tylli ki skur wa kynthup ya ka Thomas Jones Synod College, ka Kiang Nangbah Government College, ka Tome Memorial Higher Secondary School, ka Jaintia Higher Secondary School, ka Jowai Public School, ka Khimusniang Presbyterian Secondary School, ka Little Flower English Secondary School, ka H K Singh Memorial Secondary School wa ka KJP Synod Mihsngi Higher Secondary School deilang kiwa sikai kiwa yahkhmat da u HAV Sita Ram Pandey ka 42 Megh. BN NCC Shillong.
Hawa e yei klam, ka BDS Mukhim khut ko i yakrehlang yong waroh ki paidbah neibynta i khooid i jngiar. Da ban joor ko leh wa du dei yakrehlang yong waroh u ye u wanrah yei khooid wa i chait i khiah haka imlang sahlang.
Ka Assistant Commissioner, West Jaiñtia Hills District Jowai, ka LBR Marak, MCS hawa klam da pynsñiaw ko hajrong i emkaam wow emlang i kitkhlieh heiyatoh wei khooid. Ong ko leh wa i lehkhooid ym du wow wanrah yei yoosuk ki soodong sookun ha ka imlang sahlang, wanrah ko leh yei chait i khiah wei pynku ko yei rukom im.
Kyntu ko wow pyrchang lehkhooid hei im wa man-ka-sngi, deiwa yaroh leh ya ka chnat Food Safety wa chim ko ya kani ka luti najrong wa yaroh yei chimbynta ki NCC, ki Market Committee, kiwa chong dukan wa kiwa chongdai.
Discussion about this post