Jowai: Ka ri Bangladesh wa India da man ki kiwa da pynkhreh hadien wa em wa pynpoor ya ki khubor haka Internet wa em ki seiñ keiñ suloi kiwa kyrchaan ya ka Islamic State (IS) wa daw leh kaam ki ha kini ki sngi.
Neiliang ka Bangladesh da pyntip ko wa da yaklam ko wa ki heh ka India hadien wa mih kawi ka Poster kawa thoh dei ktein Bengali kawa ong ‘Shigroi Asche Inshallah’ (God, willing, coming soon).
Ha kani ka Poster da em ka chap (Logo) yong kawi ka seiñ kawa ym pu jooh sñiaw ka Al Mursalat, kawa ye u man hei ktien Arabic kawa mut ya ka Jamaat-ul-Mujahideen Bangladesh (JMB) kawa da emkti leh ya ki kaam wa chirkhei ha Holey Artisan Bakery, Dhaka 3 snem nachwa.
Neiliang ka ri Bangladesh da ong ko wa ini ye u mut wa da mang ya ka ri Bangladesh wa ki jylla ka Northeast India, heiwa ka JMB da pynmim biang ya ka hadien wa boon kiwa yahkhmat yong ka da chah kem ki ha ki pulit hadien ki kaam wa da leh ki ha Holey Artisan.
Ka JMB toh kawa thooh dkhot na Bangladesh, West Bengal wa Assam wei da yoh kem leh yaki dkhot yong ka kam na jylla Kerala wa Tamil Nadu.
Ka Bangladesh dang takit ko wow tip wa lada ki dkhot ka JMB em yatoh ki waka National Towheed Jamaath (NTJ) kawa em ha Sri Lanka kawa da tympdung bomb hapoh kani ka ri.
Ha iwi tawon i liang, ka National Socialist Council of Nagaland (NSCN-IM) da ong ko wa da man ko kawa pynkhreh wow yada ya ki paidbah ka Nagaland lada ka Islamic State (IS) thmu wow leh iwon iwon hapoh ka jylla.
Ha Nagaland 88% toh ki Kristan kawa man leh ka wi na ki le tylli ki jylla wa boon dooh ki Kristan wa kynthup ya ka Meghalaya wa Mizoram.
Haka 22 tarik uni u bnai u Nagaland Chief Secretary u Temjen Toy da phah u ya u DGP wow chimkhia ya kani ka kaam yow lait u jia iwon iwon wa sñiawsih.
Discussion about this post