Jowai: Ka chnong Panaliar, Jowai kam chibynta wow yakhun pyrchah yei poor u khñiang khlam COVID-19 chapoh ka chnong ka thaw, da pynkhreh ko wow siat dawai ha waroh ki bynta ka chnong, khamtam cha ki thaw wa lai wa wan ki bru watoh luti cha ka thaw sumaar MCH kawa em hapoh ka chnong, neitæ haki kdong ki chmiang waphær waphær ka chnong.
Yeini i pynkhreh da yahkhmat da ka VDP, kawi naki chnat krehkaam ka chnong Panaliar kawa pait yei chongsuk chongsaaiñ hapoh u pood u ang ka chnong, wa kynthup ya u President, u Fourkey Sumer, u Secretary, u Lakhon Rymbai deilang wa ki dkhot yong ka.
Neitæ ha chirup deilang waka Village COVID-19 Management Committee ka chnong Panaliar wa kyrchaan borbah ka Executive Committee ka chnong, da ye ki u pynphet yaki kaam wa yatoh wow pynyoo nuksa ya kiwa chong chnong heiwa kammon u khang u kah yei poor uni u khñiang.
Neiliang u waheh chnong u Riquoma Rq. Laloo da pyntip u wa da sdang biang ya ka yaw wa le sien chi tayaw katkam ki hukum sorkar heiwa kiwa chongdai toh u deiñ ki yaki Mask, u booh thaw sait-kti weiwa u yajngai iwi yeiwi. Heijooh i por da kyntu ki leh wym toh u dai tiar yaki bru wym em u deiñ Mask.
Da ong haroh u wa ka chnong Panaliar, khang pyrchah ko yaki bru wa wan na baar yong ka chnong, wow lai cha Pynthorwah, cha Syntu Ksiar, ka thaw wa jooh sñiawsuk ki bru u lai uiñke pyngngaad. Da khang leh ya kiwa laikhwe næ lai baamdoh wow wan palat yeipor 8:00 waje i miet, heiwa ki Volunteers ka VDP ye ki u kem ya kiwon kiwon kiwa pyrchah wei pynchitom katkam ki aiñ chnong.
“Ka por katni da khut ko ya uwi pa kawi wow tip u syndong ya jar jar i pran samen, dei wow tip u bood yaki SOP wa da pynbna ka sorkar kamjooh ki chnong waphær waphær. Wow ya im ya lai lang i chirup wei kjut; u tip u burom uwi yow wi, khnang yow lait nei yabi,” ong u Riquoma Rq. Laloo.
Ka chnong Panaliar da kyntu ko yaki lok ki jor wow dam ki u yalai yawan chapoh ka chnong lymtoh ki kaam wa dawa hadooh kattæ kattæ, neibhah i yalai yawan ebor i ya uni u khñiang wow sapdong na uwi ha uwi næ na kawi ha kawi deptæ ya rah won kylleiñ kylleiñ.
Lyngba ka chnat VDP deiwa pynboodlang yaki hukum sorkar, da pyntip wa waroh ki dukan hapoh u pood u ang ka chnong toh u khang ki thij næ heipor 6:00 PM, da khang haroh ko ya kiwa chong boon ngut charood sarok næ ki thaw wa lynngam. Deiwa yakrehlang wa ka tnat Pulit, da li uiñ man ki por yow pyndooh yeini, heijooh i por yaki kari wa pynyieñ khlem akor cha sarok.
Ki dkhot ka Village COVID-19 Management Committee neipor cheipor da yachem ki yow sylli bniah yei lai i wan ki bru chapoh ka chnong weiwa daw pynbna aiñ chooh chooh ki neini heiyatoh wa ki khawai dawai (ki wym pu chah ka sorkar) wa kiwa jia sñiawsih (yapbru) kammon u leh ki, weiwa iyi wa toh u bood ki.
Kamtæ da khut ka chnong yei yakrehlang yong waroh kiwa chong chnong kamjooh kiwa psiah wa mih chapoh ka chnong, neibynta u yada yei pran yong samen, yong ka yung ka sem, yong ka chnong ka thaw kamjooh ka ri ka muluk.
