15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Da phah khang ya 8 tylli ki Coke Factory ha West Khasi Hills

Advertisement ad1
Advertisement ad1

Ka Assembly Committee on Environment ka sorar jylla, ynne ka sngi da phah ko ya ka West Khasi Hills District Administration wow khang chwa yei krehkaam ki 8 tylli ki karkhana Coke Factory kiwa krehkaam pyrchah yaka aiñ.

U dkhot ka Assembly Committee uwa man leh u MLA ka Mawsynram u Himalaya Shangpliang da pyntip u wa ha kini ki 6-8 bnai, da em 8 tylli ki Coke Factory kiwa dang sdang krehkaam hapoh ka West Khasi Hills katkam wa pyntip u DC ka District.

“Ki tre kini ki 8 tylli ki Coke Factory ym em wan ki cha i phah hajir wa khut da u Additional Deputy Commissioner ka West Khasi Hills District iwa pynyoo wa da pynkrehkaam ya kini ki karkhana pyrchah yaka aiñ,” da ong u Shangpliang.

U Shangpliang da ong u wa nadooh u Naisaphra (August) 2018, kini ki Coke Factory da mih ki boon tylli ha West Khasi Hills hadooh wa da em wa yoh yaka Single Window Clearance ya 18 tylli kini ki jait Factory ha kini ki 2 snem.

“Ka Committee da chimkhai bha ko ya ini i em kini ki karkhana kiwa da ktah yei chait i khiah ki bru haka thaaiñ Shallang,” da ong chooh chooh u MLA ka Mawsynram.

Tangwa ka Committee da chah ko yei krehkaam ki 7 tylli ki Coke Factory kiwa biang ki kot ki sla kam ki Certificate naka State Pollution Control Board.

Katkam i ong u Chairman ka Assembly Committee on Environment, u S.K. Sunn wa ki Coke Factory haap ki hapoh ki karkhana “Red Category” heiwa u sdang yaki emkaam wow bood yaki kyndon yada rymaw wa toh u leh katkam wa da booh daka State Pollution Control Board wei du hadien ini u ye wow sdang u chna yaki.

“Hadien wa kiwa toh u pait ya ini da dep sylli ki yei rukom chna wei da yoo hun ki, daw e bor 3 bnai wow krehkaam ki heiwa daw thaw yei long i man ka la-ær, ka um wa kiwi kiwi kiwa daw phah Test chwa,” da ong u.

Ka Assembly Committee da yaklam ki leh yei tngit ka la-ær nei em ka Shakambari Ferro Alloy Pvt. Ltd ha Rwiang, West Khasi Hills.

Ka Committee, da ong ko wa ya kani ka karkhana da yoh ko yaka Single Window Clearance ha u 2011 tangwa ka State Pollution Control Board da e bor ko ha u 2015.

“Ka State Pollution Control Board ym ye ko wow pyntip hadooh katwon sien wa da lai sylli (Inspection). Wei i sien wa khaddooh da leh 10 sngi chwa, hadien wa ka Committee da paan ko yaka Report,” da ong u Shangpliang uwa da pyntip leh wa kattæ neidaw u COVID-19, da khang ya kani ka karkhana.

Ka Committee da pyntip ko leh wa da yoh yutip na u sahep ka chnat Mining wa kani ka karkhana da wanrah rngaw ko na Andhra Pradesh.

“Da phah i ya kani ka chnat wow pynyoo ki yaki kot ki sla cha ka Committee wa hadooh katwon u rngaw wa da dep wow wanrah,” da ong u Shangpliang.

U Sunn da pyrchah u leh ya i tyrwa wow leh yaka “Zoning Atlas” yow suk u chem ya kitu kiwa krehkaam pyrchah yaka aiñ.

Share this:
Previous

Pynkhreh ka Panaliar yei siat dawai wei da booh kyndon yow yakhun pyrchah ya u COVID-19

Next

Sñiawkhia ka Assembly Committee on Environment yei joor mih tdem naki Cement Plant ha Jaiñtia Hills