Ka Seng Khasi Kmie da pynkhreh bha ko wow pynman ya ka Shad Suk Mynsiem 2022, ka wow sdang nadooh ka 9 tarik hadooh ka 11 tarik uni u bnai ka wow man kawa chongkun.
Kiwa yahkhmat ka Seng Khasi Kmie wa kynthup ya u Hainess Marbaniang uwa man u General Secretary, u Banteilang S Rumnong, Chairman Publicity Committee SKK, u Arwan S Tariang, Vice President wa u D. Suiam, Cultural Secretary SKK, da pynsñiaw ki yei kyrmen wa kani ka Shad Suk Mynsiem ha uni u snem u man ko kawa phooh wa phieñ hadien wa chah pynthut noh ha ka khlam COVID-19 ha ki ar snem wa da dep.
I pynkhreh ya ka Shad Suk Mynsiem ha uni u snem da lai ko chait chait wei ha uni u snem da yooluti wa palat hajar ngut kiwa chaad kynthai wa chynrang u wan poi ki u chimbynta na kylleiñ ka Bri u Ynñiawtrep.
U Bantei da ong u wa kani ka chaad e ngooh da pynman man-u-snem neibynta i kyrkhu wa uwa booh wa thaw u e waroh chi snem. Da ong u wa i em ka khlam da pynthut ha ki 2 snem wa da dep, wei ha kani ka kynti leh daw pynman deiwa pynrkhiñ kyndon kamwa da phah da ka sorkar.
Kini ki waheh da pynsñiaw ki yei sñiawngooh ya ka sorkar kawa da e laad wow pynman ya kani ka Shad Suk Mynsiem hanla dang hap bood yei pynkhiñ. Da ong ki leh wa kawa rap phær ha uni u snem kiwa chaad daw yoh ki ya u “Khaw eh khaw shan”.
Ya ka Shad Suk Mynsiem da sdang nadooh u snem 1911 wei ha ka lai luti ha u snem 2020 toh ka sien wa nyngkong wa hap wow pynsangeh ya kani ka lympung neibhah wa wan ban ka khlam COVID-19.
