Shillong: Ka yalang wa da khut da ka sorkar ya ki dkhot ka Synjuk ki Nongsynshar Shnong ka Bri Hynniewtrep (SNSBH) da mynjur wow chah u liwan noh chwa ya kiwa chong chnong ka jylla kiwa sahkut ha North East ka wow sdang nadooh ka 5 tarik uni u bnai, deiwa bood leh ya ki kyndon wa da phah da ka chnat i chait i khiah yong ka sorkar.
Hawa pyntip ya ini, u Symbood Montri Rangbah, u Prestone Tynsong da pyntip u wa ka sorkar da rai ko leh wow booh 4 tylli ki khyrdop wow wan psiah cha kani ka jylla, heiwa daw booh leh ya ki wakreh ka chait ka khiah wow Examine ya kitu waroh kiwa chong chnong kiwa liwan. Da pyntip wa ki khyrdop næ ki thaw wow wan psiah toh ha Ratacherra- East Jaiñtia Hills, Byrnihat- Ribhoi, Bajengdoba-North Garo Hills wa Tikrikila-West Garo Hills.
U Prestone da pyntip u wa ha i yachem wa ki dkhot ka SNSBH, ka sorkar da saam ko leh ya ki Standard Operating Procedure (SOP) namo ki kyndon wa hap wow bood yow pynpoi cha ki chnong waphær waphær kiwa kini kiwa chong chnong emkaam wow tip ya ki kyndon wa haap wow leh ha i por wa liwan ki.
Chooh chooh da ong wa ki wakreh ka chnat i chait i khiah u leh ki ya ka Examine da ki Rapid Diagnostic Test Kits, wei lada chem wa em ki dak chitom daw pynkit noh cha ki thaw pynkhreh da ka sorkar, katwa ya kiwi ki wym em ya ki dak ki chin daw hap ki wow leh ya ka Quarantine wa 14 sngi ha ki thaw sah yong ki.
Ha i jooh i por, u Prestone da pyntip u leh wa ynne ka sngi ka sorkar da pynlait ko leh ya ki Helpline neibynta kiwi kiwa chong chnong kiwa sahkut cha ki jylla wa UT waphær waphær yong ka ri India kiwa kwah wow liwan noh cha ka jylla. Da ong u wa kitu kiwa chong chnong waroh kiwa kwah wow liwan wa toh u pyntip næ pynpsiah pyrtuid ya i-dæ wa ka sorkar, lym kamni ym yoh ki wow liwan. Da pyntip ya kitu kiwa kwah wow liwan wa ye ki u pynpsiah pyrtuid lyngba ka meghalayaonline.gov.in/covid wei ye leh u phone ha kini ki number 8258811914, 7005728463, 8794064688 wa 9089171167 nadooh i por 9 waje i step hadooh 8 waje i miet.
Discussion about this post