Jowai: Ka All Jaiñtia Students Union-Central Body (AJSU CB) ynne ka sngi da pynkup burom kyrpang ko ya u President warim yong ka, u Eleazer C Dkhar uwa man uwa da seiñ ya kani ka seiñ ha u snem 2017.
Ha kani ka pynkup burom da em ka yalang wa pynlai da u President ka seiñ, u Luckystar Phawa uwa da e leh ya ki kyntien pdiang burom hei emlang kiwa kitkaam ka seiñbei, ki Circle wa ki Unit ka seiñ wa u Chief Adviser yong ka, u Elnathan Pale.
Neiliang u Pale hawa e i klam da e yaroh u ya u Dkhar uwa da kitkhia neibynta ki kaam ha ka imlang sahlang, wow em i mynsien sñiawkhian deiwa pynrap wa ka seiñ ymye ko wow mylliñ ya oo neibhah i man President u man i i kyrkhu wa khroo ya ka seiñ.
Da ong u leh wa heipor wa man u (Pale) kam u President ka JSU Seiñbei da pynkha ya ka JSU Shillong Circle ha u snem 2011 lyngba i yah luti u Eleazer C Dkhar uwa da smat wow yarap ya kiwa emkaam hei kjut i chitom wot hapyrdi chiteiñ synyaaw ha Shillong.
Ka seiñ da kitbok ko ya oo heiyatoh wa i thmu wow lai cha ka kaam synchaar paidbah yong oo u man ko kawa jop.
Neiliang u EC Dkhar da e khublei u ya ka seiñ nadooh ka seiñbei, ki Circle wot hadooh ki Unit wa dang kynmoo burom ki ya oo deiwa kyntu ya ki wow kreh ki neibynta ka imlang sahlang.
Da ong u leh wa ymtoh u dooh mynsien ki wei wow man ki kiwa chlur wow kreh neibynta ki kaam paidbah deiwa ong wa da kreh seiñ u da boon snem wei emkaam wow man kiwa chlur wa kiwa minot ha ki kaam yong ki.
Discussion about this post