Ka seiñ kiwa chet ja-sngi ha ki skur wa tip kam ka All Jaiñtia Mid Day Meal Worker’s Union (AJMDMWU) ha ka 26 tarik uni u bnai da khut pynman ko ka yachemlang wa kyrpang ha Yungwalieh ka Panaliar, Jowai wei ha kani ka sngi da em leh i pynkup burom wa kyrpang ya u Khroo Lamsalanki Pariat uwa man kam uwa e buit ka AJMDMWU.
U Jerry Anderson Suting, President AJMDMWU kam u chongknor yong kani ka yachemlang da kdar u wow e ki kyntien pdiang burom wei wow siang leh ki kyntien ngoohblai ngoohsyiem katwa kiwi ki waheh kiwa da e i klam i kappæ ha kani ka yalang toh u Deibormi Syngkon, waheh chnong Tpep-Pale wa u Damehiwothi Pde, waheh chnong Chilliangraij.
Chooh chooh iwa kyrpang da yoh leh ki kyntien e mynsien wa ki kyntien kyrsu kyntu ya ki dkhot ka All Jaintia Mid Day Meal Worker’s Union na ka Banalis Syiem, President Ri-Bhoi District Mid-Day Meal Worker Association kamjooh i klam i khana hapyrdi kiwa chet ja-sngi chaphang ki bynta wa yatoh wa ka Scheme Mid-Day Meal na u Longda Bamon, In-Charge Mid-Day Meal Thadlaskein-Laskein Block.
U Longda Bamon kam u bru wa toh u pait kyrpang yei kaam yong ka Mid-Day Meal Scheme hapoh ka Thadlaskein-Laskein Block da ong u katwa ye wa lah da pyrchang u leh yeiwa miat wa bha tam neibynta i myntoi yong ki khynnah kamjooh i myntoi yong ki lok wa chet ja-sngi haman ki skur wei da khana u leh wa neiliang ka sorkar najrong i pynku ya ka Honorarium yong kiwa chet ja-sngi cha ka T. 2000 daw su won ko leh sa ka Arrear wa T. 8000.
Iwa kyrpang kyrsu kyntu u Longda ya ki lok wa chet ja-sngi wow man kiwa leh khooid hei chet i tu wei riam i bait khnang wa i baam i dih wow e cha ki khynnah skur u man iwa tei yei man i long ki khynnah.
Ka Banalis Syiem hawa klam ha kani ka yalang e ko i sñiawburom wa khroo ya ka All Jaiñtia Mid Day Meal Worker’s Union wei kyrpang leh ya u Lamsalanki u bru wa chemphang wa chynna jngai wei em mynsien u kreh neibynta wow yoh yei hok kam ki bru wa chet ja-sngi ha ki skur.
Chooh chooh ong ko leh sortok wow yoh u Lamsalanki yeini i burom wa khroo na i kiwa chet ja-sngi, i stat i chemphnag wei em mynsien yong oo wow yarap u yahluti ya waroh ki seiñ chet ja-sngi yong ki District waphær wa em ha Khasi wa Jaiñtia man i kyrkhu wei myntoi wa khroo wot ka sorkar leh da tip da bna ko ya i kiwa chet ja-sngi. Kamtæ kyrsu kyntu ko ya waroh kiwa chet ja-sngi wym hoi u mylliñ lyndet i ya uni u bru uwa da leh bha ya i, e wa i naam i pyrtuid yong oo u im i na ki por cha ki por hapoh ki seiñ yong i kiwa em ha Khasi-Jaiñtia.
Kam ka dak wow pynkhroo yei man kyrpang kani ka sngi, ki Block waphær leh wa em hapoh ka lama yong ka All Jaiñtia Mid-Day Meal Worker Union da chim ki wow pynkup burom ya u Lamsalanki kam i dak sñiawngooh sñiawburom yei kaam wa da leh neibynta i myntoi wei miat i bha yong kiwa chet ja-sngi.
Najrong i pynkup burom ya u Lamsalanki, da em leh i pynkup burom ya ki waboon walang wa kynthup ya ki waheh chnong kamjooh ya ki dkhot ka All Jaiñtia Mid-Day Meal Worker Union kiwa da chah tre hei wow pynlaibait lairyntih ya ki kaam ka seiñ na ki por cha ki por.
Neiliang u Lamsalanki hawa e kyntien ha kani ka yalang hadien i pynkup burom, da ong u i man kani ka sngi ynne toh wa em i yakrehlang nadooh ki bru ka sorkar wa toh u pait ya ka Midday Meal hadooh ki seiñ waphær wa kreh ha ka thong i miat i bha wei myntoi kiwa chet ja-sngi waroh, tæ kyrsu kyntu u deiwa ong e wa ka mynsien yakrehlang dei yarap ya chankylliang u nangkhlan ko kat nangmih ki sngi yoh wa iwon iwon iwa mut wa mang ka seiñ u poi i cha ka thong da ka luti yong i yatylli wei yatoh yumut.
