Pynkup burom ka Blood Bank ya kiwa e snaam dei langær

Kam chibynta ka World Blood Donors Day, neiliang ka Jowai Civil Hospital Blood Centre wa em ha Panaliar da lehkmen ko ya ka ynne hajrong ka phang “20 Years of Celebrating Giving: Thank You, Blood Donors” ha Conference Hall kani ka Blood Bank deiwa pynkup burom leh ya kitu kiwa wan e snaam tista nadooh ki bru samen kamjooh leh ki seiñ.

Ha kani ka sngi da emlang u Additional Deputy Commissioner, u F.B. Basan, MCS kam u kongsan uwa da klam yei emkaam u yoh smat yei snaam yow ye u pynim ya kiwa chitom, deiwa e khublei u leh ya kitu kiwa da e snaam sñiawbha kiwa da yarap ya kiwa boon ki mynsien wa kordor.

Da ong u leh wa hanla ini i sñiawngooh ya ki ymtoh da ka poisa tangwa iwa yarap won ki toh iwa kordor bha.

Neiliang ka Dr. I. Khyriem, Senior Medical & Health Officer, Jowai Civil Hospital Blood Centre da pynsñiaw ko yei sñiawngooh ya kiwa wan e snaam kamjooh yei chimkhia ki wow leh yeini yow pyntikna wym duna snaam kiwa chitom manda emkaam ki.

Kamtæ da pynchlur ko leh ya kiwa da dap 18 snem wow wan ki chakhmat wow e snaam neibhah emkaam bha ya kiwa wan e snaam tista.

Uwi uwa da e snaam dei langær la chiphaw sien, u Na Oo Saki Garod da ong u wa deiwa em ka Blood Centre hapoh ka District da yarap bha ko ya ki paidbah wa boon neibhah nachwa da hap wow lai cha Shillong yow ye u leh yei e snaam. Kamtæ da sñiaw u wa emkaam wow dap i snaam ha kani ka Blood Bank yow ye u pynemkaam heipor wa jhan.

Kiwa da chah pynkup burom ynne na ki bru samen toh u Ebed Adonai Andronicus Chullai, u Solly Meekway Bareh, u Williambor Sumer wa u Naoo Saki Garod kam kiwa khlan u e snaam.

Related posts

Lai chong biang u Acting Syiem ha ka chuki u Syiem ka Hima Mylliem

August 14, 2026

20 ngut kiwa chah e FIR heiyatoh wa iwa jia ha ka dorbar u Syiem ka Hima Langrin

August 14, 2026

Ki seiñ won kynthup ki ya ka Sarot I Man, ka Jingiaseng Samla Presbyterian Jowai, ka Occupational Health Centre Dalmia Cement Bharat Ltd, ka Kur Sookpoh Khad-Ar Wyrnai, ka Dorbar Chnong Chilliangraij, ka Seng Samla Unitarian Church, Jowai, ka Woodland WK Hospital Sabahmuswang, ka HDFC Bank, Jowai, ka CSR Department ka Star Cement, ka Khynroo Khyllood Committee Seiñraij Jowai, ka North-East Adventist University, Khliehtyrshi, ka Deimayatori, ka Green Valley Industries, ka Meghalaya Cricket Association WJHD, ka West Jaiñtia Adventure & Cycling Association, ka Jowai Civil Hospital, Blood Centre, ka Ae-Deimaya, ka Seng Samla Katholik Jowai waka Indian Red Cross Society, WJHD. 

Ha kani ka sngi da em leh i sur wa pynkhreh kyrpang da u Armanki Nikhla uwa na Chilliangraij, Jowai.