Jowai : Hadien wa da jied ya u Puramon Kynjing kam u Dolloi ka Elaka Jowai ha kani ka 17 tarik uni Thohlakhmi, ynne ka sngi ka Dorbar Chnong ka Dulong da pynkup burom ko ya oo, uwa man leh kam u khon ka chnong.
Ha kani ka yalang pynkup burom da em ki waheh wasian ki manbei manpa khynroo wa khyllood kiwa wan sakhi yeini.
Ya ka yalang da pyllai da u Snarmon Lato heiwa da yoh ya ki kyntien ngoohblai na u Pator ka Elaka u Raymon Nartiang iwa da pynbood won ya ki kyntien pdiang burom na u Waheh Chnong u Sienmonki Bareh.
U Waheh chnong da khana u leh ya ka parom wa tbian ka yong u Puramon heiwa da ong u wa da kha ya oo ha ka 12 Kmaichonglad (December) 1967, da jooh man u leh kam u Chairman ka VDP ka chnong, kam u Secretary ka Arts and Culture ka Jaiñtia Students’ Union, da ksoh u leh ya kiwi kiwi ki kaam hapoh ka chnong kamjooh leh hapoh ka Seiñraij Jowai.
Kam chibynta wow pynkup burom ya oo da pyndeiñ ya ka yuspong, da e ya ka ryndia tlem, ka yuslieñ, u dieñ chdooh wa kiwi kiwi. I klam na u P. Pariat uwa da kyntu ya waroh ya ki paidbah wow em ki i mynsien wow yakrehlang chirup wa u Dolloi.
Da yoh yei klam na ka D. Bareh da ong ko wa ynne ka sngi man ko kawa sahkynmoo yanom neibhah da yoh Dolloi biang ka Elaka Jowai da u khon ka chnong Dulong. Da kyntu ko ya ki khon ka chnong wow ksoh yei mynsien wa khooid wa bha wow yatylli wow yoh yei kyrkhu na u blai.
U Puramon hei klam yong oo ha kani ka yalang da e khublei u ya waroh ki khon ka Elaka Jowai kiwa da emlang wa da e mynsien ya oo waroh kini ki snem kiwa da dep.
“Kam u bru sñiawdap ram O nadooh ka yalang wa nyngkong wa da pynman hapoh kani ka Yungwalieh, wei i jop i yong nga toh i jop yong ka chnong kawa da emlang wa nga nadooh wa sdang i kaam wow jied ya u Dolloi ka Elaka Jowai” da ong u Puramon.
Da ong u leh “Lada ka kaam election Dolloi ma toh kam kiwi ki election nga ymbien O u yaleh, watoh i kaam wow chakri ya ki kaam bru kaam blai tæ yaleh O”
Da kular u leh wa i kaam wa nyngkong wow leh u kam u Dolloi toh wow pynskem ya ki riti krehkaam yong ka elaka Jowai hei thoh hei taar.
Da pynphooh leh ya ka yalang da ki chaad ki rwai wei da pynkut ka yalang pynkup burom da ki kyntien e khublei na u K. Lato.
Discussion about this post