Ka Chutwakhu Social Welfare Local Dorbar ynne ka sngi da pynkup burom ko ya 29 ngut ki waheh ka chnong kiwa dap 80 snem i rta haka yalang wa da pynman ha Chutwakhu Indoor Sport Hall wa pynlai da u P.W. Lyngdoh, Waheh Chnong Chutwakhu.
U Rev. (Dr.) E.R. Tongper hawa e yei klam syllok ha kani ka sngi wa pynkhroo ya kiwa da heh rta, ong u katwon man i sñiawburom wa khroo yow Blai neibhah wot haka kotbah leh da em ki bynta wa klam ko chaphang i duwai, i kyrpaad yong ki bru wa em hei rta wa da heh, deiwa kdaw yaka Psalm 71.
Ong u wa em chiboon ha ka ktien u Blai iwa klam heiyatoh i man tymmen tangwa kani ka Psalm 71 rap man kyrpang ko neibhah waroh kawi ka Psalm kawa em 24 tylli ki dkhot klam bait ko chaphang i man tymmen.
Ha kani ka sngi najrong i pynkup burom ya kiwa da heh rta da pynkup burom leh ya u Heimonlang Nongpluh IPS Officer uwa man leh u khon ka chnong, uwa dang dep thung ka sorkar ya oo kam u Chief Information Commissioner ka sorkar Meghalaya.
Heijooh i por leh kam chibynta u e mynsiem yaki khon khynroo khyllood ka chnong da e khusnaam leh cha palat 40 ngut ki khon ka chnong kiwa dapoi chakhmat hei kyrdan pure waphær waphær kamjooh leh ha ki yalehke Sport.
