Ka Dorbar Chnong Mynso-B ha ha 16 tarik uni u bnai da pynkup burom ko ya ka khyllood Bachina Lyngdoh kawa chong wa sah ha chnong Mynso B kawa da yoh u psiah ha ka kyrdan wa 7 yong ka Exam HSSLC na ka Commerce Stream kawa da pynbna da ka MBOSE ha ki sngi wa dadep.
Kamjooh leh ha kani ka sngi da yoh leh u pynkup burom ya ka Mynso PHC kawa da lehbha ha ka National Quality Assurance Standards Certification deiwa ye u yoh (Score) hadooh 96.37% iwa man i burom wa khroo ya ka chnong wa ka thaaiñ.
Ha ka yalang wa tbian wa da pynlai da u Waheh Chnong ka Mynso-B, u BS Myrchiang, da yoh i klam neiliang yong ka chnong da u RM Khlem uwa man leh u Assistant Commissioner ka chnat Excise ka sorkar Meghalaya heiwa ha i klam yong oo da dap u dei sñiawkmen wa khroo wow tip wa ki khon ka chnong da lehbha ki ha ka SSLC wa HSSLC wei ki khynnah da Pass ki 100% khamtam wow tip wa ka khon ka chnong da poi ko ha ka 7th Position yong ka Top Ten.
Da e u leh i yaroh ya ka PHC hapoh i yahkhmat u Doctor In-Charge, u Dr. Khainmi War wa da ye ki wow poi hakhmat ha ka NQAS Certification wa dadep leh ha uni u snem deiwa yoh hadooh 96.37%.
Da yoh leh i klam na ka Bachina Lyngdoh, u Dr. Khainmi War wa ki kyntien khublei na u Secretary yong ka chnong, u F. Syntem.
Discussion about this post