Kam chibynta wow burom ya i chakri wa e ki wakreh namo ki Conservancy Staff ka Jowai Municipal Board (JMB) ya ki paidbah, ynne ka sngi ka Dorbar Chnong Mynthong, Jowai da pynkup burom ko ya ki wakreh ka Board ha ka yalang wa tbian wa man ha Hall ka Dorbar Chnong.
Ya kani ka yalang da pynlai da u Lamphrang Pohktai, uwa man kam u Waheh Chnong ka Mynthong uwa da e ya ki kyntien waiphang heiwa da ong u wa i thmu ka chnong toh wow pynchlur wei wow e mynsien ya ki wakreh ka Board wei kamjooh leh wow e sñiawngooh ya ki.
Da ong u wa hadien ar snem wa wan ka khlam COVID-19, ka chnong ka thaw da kyruiñ ko cha ki le bynta kiwa haphrang dooh yong i yakhun ya ka khlam namo ki Frontline Workers heiwa kini kynthup ki ya ki ASHA, kiwa pathai khubor wa ki wakreh ka JMB heiwa da man ki kam ki chrot ka imlang sahlang.
Ha kani ka sngi da emlang leh u Fidel War uwa man kam u Chairman ka Board, u S. Amse uwa man kam u Executive Officer ka JMB, u H. Passah uwa man kam u Asst. Engineer ka Board, kiwa kitkaam chnong wa kiwi kiwi.
Neiliang u Chairman ka JMB, da ong u wa ini i leh ka Mynthong man i thmu wa khia wa iwa yaar bha neibhah wa ki wakreh ka Board da tia ki chaphrang khlem ñiawliar ñiawtang ya i maa wa yang ya ki.
Da ong u wa kini ki wakreh ka JMB da kreh ki ym du neibynta yong ki tangwa ya i bha yong i samen samen wa ya ka chnong ka thaw wa ka imlang sahlang.
Ha kani ka sngi da yoh leh i klam na ka S. Suting, President ka Seiñkynthai kawa da e khublei ya ki wakreh ka Board kiwa da ye u wanrah ya i khooid i jngiar ha Mynthong wa ka Jowai hi waroh kawi.
Ynne ka sngi ha ka yalang, u R. Khonglah uwa man u Secretary ka Mynthong da e u ya ki kyntien pdiang burom katwa ya ki kyntien e khublei won da yoh na u Asst Secretary chnong, u D. Lathong.
Ha kani ka sngi da pynkup burom ya ki 24 ngut ki wakreh ka JMB wa kamjooh leh ya ki 2 ngut ki ASHA ka chnong.
