Ka Hill State People’s Democratic Party (HSPDP) ha ka 10 tarik uni u bnai da pynkup burom ko ya kitu kiwa yaleh yoh jylla heipor ka Hill State Movement kiwa da chah kem neidaw wa yakhih pyrchah ki ha kiwa boon ki bynta yow pynkha ya ka Meghalaya na ka Assam ha ka 21-01-1972.
Na ki 301 ngut kiwa da em yei pyrtuid wa ka HSPDP, 58 ngut toh kiwa da pynkup burom da ka HSPDP kam chibynta ka lyngkhooh dap 53 snem ka Party.
Hawa e yei klam ha kani ka yalang, u General Secretary ka HSPDP uwa man leh kam u Montri hapoh ka Meghalaya Democratic Alliance (MDA), u Renikton Lyngdoh Tongkhar da ong u wa daw rah u hakhmat ka sorkar wow pynkup burom ya kini kiwa da mih chakhmat wow chimbynta ha ka yakhih Hill State Movement kam chibynta wow lehkmen dap 50 snem ka jylla ha u 2022.
Da ong u leh wa ha ini i dap 53 snem ka Party, ka Party kwah ko wow wanrah dei pyrkhat wa thymme.
Da ong u wa ka Party kwah ko wa ki paidbah ka jylla wow chimkhia ki yei dawa wow man ki kam ki yong ki ym toh ki yong ka Party.
Neiliang won u T. Lyngdoh uwa na Nongstoin, West Khasi Hills District uwi na kiwa yakhih wow yoh jylla hawa e yei klam da kyntu u ya ki paidbah wow e laad ya ka HSPDP wow synchaar ya ka Meghalaya.
“Kamwa kiwi ki bru ka ri da tipmit ki ya ka Congress yei bynta yong ka hawa yakhih laitlooid wei da synchaar ko ya ka India kamwa 40 snem, kamtæ ya ka HSPDP toh u e yei jooh i laad.
Katkam wa ong u Lyngdoh, lada e laad ya ka HSPDP, daw wanrah ko yei synchaar wa khooid wa lait nei baam tooh.
Ha kani ka sngi uwi na kiwa yaleh wow yoh jylla da pynyoo u ya ka sula wa sap u heipor wa em hapoh patok.
