theme-sticky-logo-alt
theme-logo-alt
Advertisement ad1
Advertisement ad1

I pdiang burom ka chnong Mulieh ya ka Trinity Saioo i wow sah khana parom yanom

Ynne i miet ka 10 tarik ka Dorbar Chnong Mulieh, West Jaiñtia Hills dei mynsien wa kmen wei sñiawsarong da pdiang burom ki ya ka manbei na ka chnong, ka Trinity Saioo kawa da rah burom ya ka chnong wa ka Ri-loom Jaiñtia hi waroh kawi hadien wa da chah pynkup burom ko da i naam Padma Shri Award na u President ka ri, u Ram Nath Kovind ha Rashtrapati Bhavan, New Delhi ha ka 8 tarik uni u bnai. 

Ya ka Trinity da pdiang na Statue ka Maria, Madankynsaw heiwa da pdiang ya ka da ki tre chnong kamjooh leh u Waheh Chnong ka Madankynsaw, u Danny Shadap wei da synraan ya ka tymbud luti hadooh wa poi ha Madan Skur Wah Chnong, Mulieh heiwa da em ka yalang wow pdiang burom ya ka. 

Ha kani ka yalang wow pdiang burom ya ka Trinity Saioo da wan sakhi da u MLA ka Raliang, u Comingone Ymbon kam u kongsan hei emlang u BDO ka Laskein Block, u Dr. Brightstar Langbang kam u symbood kongsan wa kiwi kiwi wei da pynlai ya ka da u Waheh Chnong ka Mulieh, u Roilakson Suchiang. 

U Michael Saioo uwa da khana ya ka parom yong ka luti wa da lai ka Trinity hadooh wa poi wei yoh ko ya ini i kyrdan heiwa da kyntu u leh ya ki warep wa emkaam wow rep khlem da pynemkaam ya ki dawai tangwa da i sboh iwa da em chwa iwa da yah da ki warim. 

U Demanson Lyngdoh uwa man kam u Project Officer ka Lakadong Mission da khana u kajiak chaphang kammon da yoh ko ya ini i burom wei kammon da sdang ya ka Mission Lakadong kawa yatoh wa u chyrmit. Heiwa da ong u leh wa kani ka burom man ko leh neibynta ki warep neibhah kamwa 80% kiwa chong chnong ka thaaiñ toh ki warep. 

U Brightstar Langbang hawa e yei klam ha kani ka miet da ong u wa kam u BDO wa ki paidbah ka Block dap ki sñiawkmen wa yoh ya ini i burom heiwa kiwa boon ki bru daw tip ki ya kani ka chnong Mulieh. 

Da ong u wa ya uni u mar da tip lut ka pyrthai tangwa emkaam wow tip kammon wow pynlai yaw wei wow pyndap yeiwa dawa ya u chyrmit Lakadong wei emkaam wow man kiwa yatylli khnang wow ye u pynbait ya i dor. 

Ka Trinity ha kani ka yalang da ong ko wa ynne hawa sakhi ya kiwa wan pdiang ya ka pynyoo i yei maya wa em ki warep. Da e khublei ko ya waroh kiwa embynta wow poi ko ha kani ka kyrdan khamtam ya u Blai. 

Da kyrpaad ko leh ya ki warep wow pynneh pynsah ya u Chyrmit Mulieh Lakadong deiwa kyntu leh ya u MLA wow e yarap ya ka skur St. Margret RCLP School Mulieh. 

Heijooh i por da ekhublei kyrpang ko ya u KN Kumar uwa man kam u Chairman ka Meghalaya Farmers Empowerment Commission, u Montri Rangbah ka jylla, u Conrad Sangma wa kiwi kiwa da yarap ya ka hei wow yoh ko ya ini i naam i burom wei khamtam leh ya u DC ka West Jaiñtia Hills, u Garod LSN Dykes uwa da tyrwa ya i pyrtuid yong ka wow yoh ya ini i naam i burom.

Kam u kongsan ha kani ka sngi, u Comingone da dap u dei sñiawkmen wa yoh ka khon ka Constituency wa ka Ri-loom Jaiñtia waroh kawi ya kat ini i naam na ka ri India heiwa kani ka Padma Shri toh kawa em ha ka kyrdan wa soo na ki burom wa e cha ki bru paidbah. 

Da ong u wa hawa em i dawa ya u Chyrmit neiyi i daw wa ymye wow pynjanai wei wow pynkhlan chooh ya i rukom rep khnang wow ye u pyndap yei dawa iwa wan na kylleiñ. Da tyrwa u leh wow e ya ka kor loor namo ka Power-tiller ya ka chnong khanang wow ye ki u pynsuk ya ki warep. 

Da kyntu u leh wa emkaam wow ksoh ya ini i naam heiwa manda wan ki bru wa na baar emkaam wow pdiang burom ya kitæ ki bru khnang wa hadien wa daw ye u kamai wot nei wanke ki bru cha ki chnong ki thaw. 

Ha kani ka yalang hajrong wa i e sñiawbha ya ka Trinity Saioo da ki bor ka chnong, kiwa sikai ka St. Margret RCLP School, ki SHG wa ka Manbha VO, neiliang ki khon yong ka leh da pynkhreh ki ya u Cake wa da chna pynwandur ha i takma wa i burom wa da pynkup ya ka ha nongbah New Delhi. 

Kiwi kiwa da klam ha kani ka sngi toh u Alfons Kharsyntiew uwa man kam u General Secretary ka Hills Farmers Union, wa kiwi kiwi. 

I pdiang burom ya kani ka manbei ynne ka sngi hapoh ka chnong ye i wow man i wow sah khana parom yanom neibhah nadooh u MLA ka thaaiñ, ki sahep kamjooh leh ki paidbah ka chnong chynrang wa kynthai da chah ki yei dait i kjam ha kani ka samoi wa sdang ka tlang. 

Share this:
Previous

Ym em ieh mylliñ ka HSPDP yeiwa da dawa ko la 50 snem: Pangniang

Next

Pynkup burom ka HSPDP ya kiwa yaleh wow yoh ya ka jylla Meghalaya