Ka Education Cell yong ka Jaiñtia Students’ Union (JSU) Central Body da pynman ko ya ka 1st Prof. Barrister Pakem Academic Excellence Award ha ka 13 tarik uni u bnai ha District Library Auditorium, Jowai wei ha kani ka yalang wa khroo da pynkup burom ya palat 80 ngut ki khynnah khynroo kiwa da khur ya ki naam wa chakhmat ha ka SSLC wa HSSLC kiwa yoh 85% chaneiñ, ki Gold Medallist wa kiwa yoh Ph.D kiwa waroh na Jaiñtia Hills.
Ya kani ka yalang da pynman hapoh ka phang pyrdi wa ong, “Empowering Minds, Shaping Futures, Celebrating Excellence” wei da wan wow sakhi wei chimbynta da u Lahkmen Rymbui, Montri ka chnat Puræ Puthi ka sorkar Meghalaya kam u kongsan.
U Lahkmen hawa e yei klam da pynsñiaw u yei kmen hadooh kattæ kattæ hawa yoo yei lehbha ki khon khynroo ha ka puræ puthi wei da kynmoo warom leh yei pyrtuid u Prof. Barrister Pakem.
Kiwi de ki waheh wasian wa da emlang ha kani ka sngi toh ka Dr. Didakamiwan Khonglah kawa man ka khon u Prof. Pakem, u Prof. Henry Lamin (Ex-Pro VC NEHU), ki MDC, ki sahep sorkar wa kiwi de kiwa yahkhmat ki seiñbhalang.
Da pynchongchit yeini i pynkup burom da i sur rwai wa sñiawsuk wa sñiawbang na ki khynnah ka Elev8 Choir.
Ya kani ka yalang da pynlai da T. Suchen, Ex-General Secretary JSU wei da man ko kawa jop deiwa yahluti wei kitkhia u Education Secretary, u Bocheru Mi Pohsnem wa i kyrchaan u President, u Jersom Shylla wa waroh ki dkhot ka JSU.
U Secretary, u B. Pohsnem da ong u, “I thrang wei thmu kani ka sngi toh chibynta u man ko leh kam ka dak wow e mynsien yei kreh chitom ki khynnah khynroo yong i ha ka puræ puthi deilang i kynmoo warom ya u (L) Prof. Barrister Pakem.”
Discussion about this post