Ka Dorbar Chnong Khliehmushut Shangpung, West Jaiñtia Hills District hapoh i yahkhmat u waheh chnong u Tuesday Lytep, u General Secretary u Riki Sayoo deilang wa ki dkhot, ynne ka sngi kawa man leh ka sngi baamdoh kutsnem yong ka chnong, da chim haroh ki ka bynta wow pynkup burom ya kiwa yahkhmat yong ka chnong kiwa da e i chakri nadooh u snem 1994 hadooh u snem 2020.
Ini i pynkup burom man ko leh kam chibynta u e i sñiawngooh ya ki kaam wa khroo wada leh ki heiyatoh wow saiñdur yei bha i miat yong ka chnong ka thaw.
Kiwa chah pynkup burom kynthup ki ya u Wantipsngi Rabon uwa da man waheh chnong ha u snem 1994-2000, u Finely Papang kam u waheh chnong ha u snem 2000-2004, u Raphoi Iakai kam u waheh chnong ha u snem 2004-2011, u Nidayoo Papang kam u waheh chnong ha u snem 2011-2020. Najrong ki 6 ngut ki General Secretary wa ki 21 ngut ki dkhot, da pynkup burom haroh yaki manbei wa jooh embynta hapoh ka seiñkynthai wa kamjooh leh ya kiwa jooh noh kyllooid cha ka chnong ka thaw.
Ha kani ka sngi pynkup burom da emlang leh u MLA ka thaaiñ u Comingone Ymbon, neitæ u H. Iakai, u K. Shylla, u B. Langstang, u M. Langstang wa kiwi.
Waroh kiwa e yei klam da yaroh ki ya kiwa yahkhmat wa nachwa neibhah lyngba i prat luti yong ki, ka chnong ye ko u ku kamwa man ko katni. Heijooh i por kyntu ki ya kiwa yahkhmat katni wow nangkreh chitom ki yei kaam khnang wa i roi i paar u tyllung ko neipor cheipor.
Neiliang u MLA da ban joor u hajrong i emkaam wow yakrehlang, wei kyntu haroh u wa hawa yoh kiwon kiwon ki Scheme yarap hapoh ka chnong ka thaw toh u kreh pynsmat yei kaam, neibhah oo hi kam u MLA rap sñiawsuk u wow pteiñ i e Scheme pynroi ha ki chnong wa smat u kreh pyndep yei kaam.
