Jowai: Ka KJP Synod Mihngi Higher Secondary School Jowai, ynne ka sngi da pynkup burom ko ya ki ar ngut ki khynnah ka skur kiwa da rahnaam rah burom ya ka skur kamjooh ya ka Ri-loom Jaiñtia hi waroh kawi ha ka Result SSLC wa HSSLC yong uni u snem wa da pynbna da ka MBOSE.
Kini ki ar ngut kynthup ki ya u Khroo Meda Dkhar uwa da psiah ha ka kyrdan 6th Position yong ka thup Top-10 HSSLC (Science Stream) wa ya ka Ibalahun Rymbai kawa da psiah ha ka kyrdan 13th Position yong ka Top-20 SSLC wei da yoh ko ya ka Highest Marks ha ka Mathematics wa Khasi.
Ha ka yalang pynkup burom wa da pynlai da u Principal ka skur u Rev. Meshak Shylla da emlang leh u Wailadmiki Shylla MLA ka 2-Jowai kam u kongsan, u Moderator KJP Synod Mihngi u Rev. B.B Lamin kam u symbood kongsan, wa kiwi kiwi.
Neiliang u Khroo Meda Dkhar wa ka Ibalahun Rymbai, da kyntu ki ya ki para khynnah skur wow bood ya ka nongmuna yong ki, wei wow booh thong ki pyn haki hi wei wow em i sñiaw wa lada kiwi ye ki ileh i ymye i wei wow bood ya ka luti wow man ki kiwa minot.
U Wailadmiki kam u kongsan da ong u, “Lada em i thrang wow wanrah yei kylla wei kiwi wow tipmit ki ya i, iwa kongsan tam toh wow wanrah i kylla chwa pyn ha i hi,” deiwa kyntu ya kiwi ki khynnah skur wow chim kabu ya kiwon kiwon ki kaam wa pynchlur kiwa sikai ya ki neibhah wa ini wai luti i ya ki wow poi chakhmat.
Chooh chooh da ong u wa i rta khynnah skur man i iwa kordor wei lada ymye u syndong u husiar kam ha kini ki por daw man i iwa sepai lut waroh.
Katwa neiliang u Rev. B.B Lamin won da e u ya ki kyntien kyrkhu kyrdoh deiwa kyrmen wa kani ka skur daw man ko ka nongmuna ya kiwi tawon ki skur wei kiwi leh u ku ki neipor cheipor.
Discussion about this post