Ka Khasi Students’ Union (KSU) Jaiaw Circle ynne ka 15 tarik da pynkup burom ko ya ki khynnah puræ ka Jaiaw Pyllun kiwa da poi chakhmat ha ki puræ puthi waphær waphær nadooh kiwa puræ Class 6 hadooh ka kyrdan PhD, wei da saam khusnam kyrpang cha kitu ki khynroo khyllood ka chnong Jaiaw Pyllun kiwa da e sñiawbha neibynta wow kyntu wei wow wanrah naam ya ka chnong ka thaw Jaiaw, ka ri wa yaka jaitbru.
Ha kani ka sngi, da pynlai ya ka yalang da u GS ka KSU Jaiaw Circle u Pynskhemlang Uriah, da yoh i klam waiphang na u Ostarnic Marbaniang u President ka KSU Jaiaw Circle, i klam kyntu kynpham na u symbood kongsan u Aguster Jyrwa GS warim ka KSU seiñbei, wei da yoh ya i klam pynkut na u kongsan ha katei ka sngi u Donald V Thabah, GS ka KSU seiñbei.
Ha kani ka yalang da em leh u Sonstar Nongkhlaw Asst.GS KSU seiñbei u Barikular Nongsiej wa man u President warim ka KSU Jaiaw Circle, ki rangbah dong na ki dong waphær waphær ka chnong Jaiaw Pyllun, ki bei ki kpa ki yong ki khynnah wa chah pynkup burom wa kiwi kiwi de.
Neiliang u kongsan ha katai ka sngi u Donald V Thabah da pynsñiaw u wa ka KSU seiñbei da sdang ko nadooh u snem 1994 yow pynkup burom deiwa saam khusnam ya kiwa da lehbha haka puræ puthi khnang yow man ko kam chibynta wow kyntu ya ki paradoh parasnam ha ka puræ puthi tangwa ha utai u snem du kawi ka kynthai na ka jaitbru yong i wa yoh ya ka kyrdan wa hakhmat ha ki kyrdan Top 10 ha ka Matric (SSLC) tangwa ha kani ka kynti da man ko kawa sñiawkmen chiboon wa du napoh ka Jaiaw Pyllun leh ka KSU Jaiaw Circle da ye ko wow saam khusnam hadooh 58 ngut kawa man ka kyrkhu kawa khroo ya ka jaitbru.
Kamtæ da kyntu u ya kini ki khynroo khyllood wow nang kreh chitom chooh chooh ha ka puræ puthi, wa ym toh u hun du wow biang yei yong samen wei wa emkaam wow man kiwa smat wow e ka kti timun tidiang ya ki paradoh parasnam kiwa emkaam yarap khamtam kiwa kup chilliang sem chilliang khnang wa ka ri waka jaitbru wow nang ko chakhmat.
Discussion about this post