Ka Khasi Students Union War Jaiñtia Circle ynne ka sngi da pynkup burom ko ya ka Evangel Pohplet kawa man naka chnong Syndai War Jaiñtia kawa da wanrah yei naam i burom ya ka thaaiñ waroh kawi wei khamtam ya ka ri waka jaitbru.
Ka Evangel Pohplet da yoh ko yei naam jop ha ka 3rd National K-1 Championship Amateur/Pro & K-1 Pro Boxing 2022 kawa man ka lympung yalehke Kickboxing kawa da pynman ha Jaipur heiwa da yoh ko ya ka khusnaam Title Belt wa kamjooh ka Best Female Boxing Champion of India.
Ka Evangel Pohplet da khana ko wa da wan ko naka manyung wa dooh wa duk tangwa dei kreh chitom miet wa sngi da poi chadooh kani ka thong wow wanrah ya ini i naam i burom ya ka yung ka sem waka thaaiñ hi waroh kawi.
Ha ini i pynkup burom da pynlai da u Lurman B Talang, General Secretary wei da e yei klam maitphang da u Platini Mukhim uwa man u Publicity Secretary, uwa da ong wa ka sorkar ym jooh em por ko wow pait lane yarap ya ki khynroo khyllood wa em yei sap khnang wow ye ki u ku chaphrang yow wanrah yei naam i burom ya ka jylla hi waroh kawi.
Ha kani ka yalang da emlang ka Ladaplyn Hayong deilang wa u Officer Incharge ka Amlarem Police Station, u Sandy Manner uwa da e leh yei klam wa i yaroh yei kreh chitom ka Evangel Pohplet wa da man i sarong ya ka jylla hi waroh kawi hajrong i wanrah yong ka ya i naam i burom. Da kyntu kynpham wei da e u yei sneiñ i kroo cha waroh ki khynnah khynroo khyllood wa toh u man ki kiwa kreh chitom wei minot khnang wow ye ki u wanrah yei naam i burom ha ka thaaiñ hi waroh kawi.
Ka seiñ dei bor wa khian da yaleh chitom ko wow e yarap ya ka Evangel kawa da wanrah yei naam ya ka ri waka jaitbru hi waroh kawi.
