Ka Meghalaya Govt. Pensioner Association Jowai Branch ha ka 22 tarik uni u bnai da pynkup burom ko ya u Wanteibok Pator uwa da yoh hei kyrdan 2nd Position ha ka SSLC ha ka yalang wa pynman ha Sow Lyngdoh Higher Secondary School, Mowkaiaw West Jaiñtia Hills.
Ka Pensioner Association Jowai Branch, man-u-snem da pynemburom ko ya kitu ki khon ka ri Jaiñtia kiwa da poi chakhmat ha ka Exam SSLC heiwa da e cha ki da ka song poisa kawa T. 10,000 lyngba ka Cheque deilang waka Certificate kam wow pynchlur ya ki.
U Wanteibok Pator najrong wa yoh u hei wa ar ha ka Merit List, da yoh u leh chispah naka chispah ha ka Mathematics wei katni dang lai puræ u ha ka North Liberty Higher Secondary School, Jowai.
Ha kani ka sngi neiliang ka Association da yoh i klam na u President yong ka, u Lakhon Shylla wa na ka Principal ka skur katwa ya ka khusnaam da saam da u BG Ladia wei da yoh ya ki kyntien e khublei na u TW Blah, u Secretary ka Association.
