Pynkup burom ka NPYF ka NPP-Mowkaiaw ya 21 ngut kiwa lehbha ha ka SSLC wa HSSLC

Ka NPYF ka NPP 4-Mowkaiaw ynne da pynkup burom ko ya 21 ngut ki khon khynroo ka Constituency kiwa da lehbha ha ka Exam SSLC wa HSSLC.

Ya kani ka yalang da pynman ha yung Dorbar Hall ka Mowkaiaw hei pynlai u Ardakirang Rymbai, Secretary NPYF Mowkaiaw Block heiwa yei klam pdiang burom da yoh na u Heirtami Suting, President NPP Mowkaiaw Block uwa da ong wa ka NPP hawa yoo yei kmen wei pdiang phi ya kani ka khusnaam da yoh bor yoh mynsien ko wow kreh chiboon ki kaam wa bha kam ka Party neibynta i bha i miat ki khon khynroo khyllood waroh wei hawa thmu wow e ya kani ka Award wym em mut wow e du da ka poisa tangwa emkaam wow e bor e mynsien ya phi kiwa lehbha wei lym toh da ka poisa leh tangwa da ki kot ki sla wa kiwi kiwi tawon ki e sñiawbha wa emkaam.

Ha kani ka sngi da emlang wa u Eilad Suting kam u Resource Person uwa da sneiñ da kroo deiwa ong wa i stat i tip ym em mut wow kheiñ du da ki Marks, ki Percentage næ ka kyrdan wa pyndep ki tangwa deiwa kheiñlang yei rukom man wa bha wa ka burom akor ha-yung ha-sem wa haka imlang sahlang.

Da ong u leh wa i tip wow pynemkaam ya ka stat Technology ha kini ki sngi ha ka puræ puthi daw yarap ko chiboon wow pynbha wei wow sñiawthooh rap bha ya ki phang wa da puræ namo ki Subject ha ki kaam puræ wa man-ka-sngi.

Heiyatoh wa ki laad puræ puthi da ong u wa najrong ki General Course em leh chiboon kiwi kiwi ki Course kiwa yei phi wow chim hadien Class-XII næ Graduation wei kini ki Course yei ki wow yarap pynyoh kaam ya phi da ki waphær waphær wei ym hoi u chaniah ware i du ha ki kaam sorkar.

Neiliang won u Phermanbha War, State General Youth Secretary ka NPYF, hawa e yei klam da ong u wa ka jylla Meghalaya da slem bha ym em de u yoh ko ya ki IAS wa IPS da ki phaw snem kattu, kat da kamtæ emkaam ya ki khon khynroo khyllood yong i wow pyrkhat bha wow em ka thong u kreh chitom hei puræ puthi khnang yow poi chadooh kini ki kyrdan.

Neiliang u kongsan ha kani ka sngi, u C. Ymbon uwa man kam u Montri sorkar da ong u wa ym em wa ye u khanglaad ya phi wow yoh kaam sorkar næ ha kiwon kiwon ki laad lada man phi ki khynnah wa kreh chitom hei puræ puthi wei da ong u leh wa ki bei ki pa wym hoi u pynchlur ya ki khon du ha i kaam sorkar tangwa emkaam u pynchlur da kiwi tawon ki laad ki luti hawa pynstat i ya ki khon yong i.

Da u leh ki kyntien kitbok kitrwiang ya ki khynnah waroh.

Neiliang u Hamelamsuk Hadem uwi na kiwa chah pynkup burom uwa da yoh 93% ha ka SSLC, hawa e yei klam, da yaroh wei e khublei u ya ka State NPYF wa ya ka NPP Mowkaiaw Block neibynta wa da ye wow pynmankaam ya kani ka yalang kawa da e bor e mynsien sakhiat ya ki kam ki khon khynroo khyllood wa da Pass ha kani ka Exam SSLC wa HSSLC.

Ha kani ka sngi da emlang ki waheh nadooh MDC warim ka Saphai, u Habahun Dkhar, u Lasting Suchiang, u Founderson Syngkon, u Wanphrang Laloo, u Ribok Biam, u Remdor Lyngdoh, u Bait Lyngdoh (Waheh Chnong warim ka Laskein), u Iadamiki Lyngdoh (Secretary Chnong warim ka Mowkaiaw), u Dangawansuk Sungoh, u Nithiejbha Shadap, u Lalrem Dkhar, u Mon Biam (Vice President NPP Mowkaiaw Block), ka Rima Suchiang (President Women’s Wing Mowkaiaw Block), ka Balari Lapasam (Secretary Women’s Wing Mowkaiaw Block) wa kiwi kiwi ki waheh ryngkat wa ki bei ki pa ki khynnah skur.

Ya ki kyntien khublei wei kyrkhu kyrdoh da e da u Chanki Lyngdoh, Secretary NPP Mowkaiaw Block (MDC warim) cha waroh ki waheh nadooh u kongsan wa ya ki khynnah skur, ki bei ki pa wa ya ki khon khynroo ka chnong Mowkaiaw kiwa da yarap ha ki kaam wa boon wa ya ka dorbar chnong Mowkaiaw waroh kawi.