Ka Seng Samla Katholik Parish Nangbah hapoh i yahkhmat ka Larihun Susngi waka Heigenica Lamare kiwa man kam ki Education Secretary yong ka seiñ da e khusnaam ki cha ki khynroo khyllood da ka 1st Otto Hopfenmuller Excellence Award 2022 ya kiwa da leh bha ha ka SSLC wa HSSLC ha ka yalang wa da pynman ha ka 30-07-22 hapoh ka Parish Nangbah.
Ka Heigenica da pyntip ko wa kani toh ka sien wa nynkong wa ka seiñ da pynman ko ya kam kani ka yalang neibhah wa da chim wei sñiawthooh wa ka puræ puthi toh kawi na kiwa emkaam dooh khamtam hapoh kani ka Parish kawa man kawa khian dooh na waroh ki Parish kiwa em hapoh ka Jowai Diocese.
Neiliang u President yong ka Seng Samla, u Euginesius Hinge da khana u wa ha kani ka sngi, ka seiñ da pynkup burom ko leh ya ki bru rangbah, ki manbei, manpa kiwa da kreh chitom na waroh san tylli ki Balang chnong kiwa da kyntu yei nang i stat hapoh ka Parish wei kamjooh leh kiwa da kreh borbah neibynta wow pynyaar yei kaam yong u Blai hapoh ka Parish Nangbah hi waroh kawi.
Da khana u leh wa da saam khusnaam cha u Carlish Hinge uwa da kreh la 25 snem kam uwa yahkhmat Balang ha ka chnong Nangbah.
Ka kyrwoh na u Publicity Secretary yong ka seiñ, u Poibiang Lamare.
