Ka Seiñ Kur Dkhar Jaiñtia Hills, Wapung Circle da pynkup burom ko ya ki 27 ngut ki khynroo khyllood ki khon ka kur kiwa da leh bha hei puræ puthi ha ki kyrdan puræ waphær waphær ya kawa da tip kam ka “Excellence Award 2021 Ceremony”.
Ya ka yalang pynkup burom da pynman ha Jalyiah, East Jaiñtia Hills hei ya emlang ki dkhot wa yahkhmat yong ka Seiñ Kur Dkhar na East Jaiñtia wa West Jaintia Hills District ha ka 4 tarik uni u bnai.
Ha kani ka sngi da em leh ki chaad tynre na ki seiñ khynroo yong ka Khliehmyntriang, Jalyiah, Tuber Kmai Shnong wa Wapungskur wa na ki seiñ manbei ka Pamrakmai wa Wapung Chnong hachwa wow pynman yei pynkup burom wa da emlang wei da pynlai ya ka yalang da u President ka Seiñ Kur Dkhar Wapung Circle, u Shaniahskhem Dkhar wei da yoh leh i klam pdiang burom na ka Rosila Dkhar na ka chnong Iongkaluh wa kynthup ya u waheh chnong.
Da yoh leh ya ki kyntien sneiñ kroo ya ki khon khynroo yong ka kur na u Hamjhan Dkhar uwa man u General Secretary yong seiñ kur Dkhar Central Body wa na u Teres Dkhar, u President ka Kur na East Jaiñtia wa kiwi kiwi. Waroh kiwa da klam da yaroh ki ya kini khynroo ki khyllood kiwa da wanrah yei naam i burom ya idæ samen, ya ka yung ka sem wa ka kur Dkhar wei da kitbok kitrwiang wei da kyrkhu kyrdoh wow nang ku ki chaphrang ha i puræ puthi yong ki. Da yoh leh yei klam na u Justine Dkhar, Ex-MLA.
Ha kani ka jooh ka sngi ka Seiñ Kur Dkhar da pynskem ko ya ka Jalyiah Khliehmyntriang Unit wei da pynsmai leh ya ki dkhot wa kitkaam neibynta ka samoi krehkaam yong u snem 2021-2024 wei yei pynsmai da chimkti da u Harwis C Dkhar uwa man u Vice President yong ka seiñ kur Dkhar Central Body.
Kiwa kitkaam yong ka Kur Dkhar Jalyiah Khliehmyntriang Unit 2021-2024 man ki kamni:
Hamklet Dkhar-President
Emmon Dkhar- V. President
Lamphrang Dkhar-Secretary
Joining Dkhar- Asst.secretary
Wom Dkhar- Treasurer
Market Dkhar-Adviser
Wa ki dkhot kiwa pynyabi kiwa em hadooh 53 ngut.
