Ka yung krehkaam ka Seinkur Suchiang (Central Body) da pynsñiaw ko yei sñiawngooh ya u Kalbod Suchiang uwa da e sñiawbha ya i thaw cha ka Seinkur Suchiang Central Body iwa em ha Phramer, Elaka Shangpung.
Kamtæ hajrong ini, neiliang yong ka Seinkur Suchiang Central Body kam i dak yong i sñiawngooh, da pynman ko yaka yalang pynkup burom ya u Kalbod Suchiang ynne ka 17 tarik ha Clearwater U.P. School Shangpung ha ka yalang wa pynlai da u President yong ka Seinkur Suchiang Central Body u Carmel Suchiang.
Kiwa klam ha kani ka yalang kynthup ki ya u Parajan Suchiang, u J. Treilang Suchiang u MDC ka Shangpung, u Dr. Running L. Suchiang, ka Ruby Suchiang wa kiwi kiwi ki heh kur. Heiwa da pynkut yaka yalang da i e khublei na u General Secretary yong ka Seinkur Suchiang Central Body, Dr. Damewan Suchiang.
Kiwa da e yei klam ha kani ka sngi, da pynsñiaw ki yei sñiawngooh wa khroo ya i kyllooid mynsien yong u Kalbod Suchiang kawa da wailaad wai luti yaka Seinkur wow yoh i yong ka hi i bynta neibynta ki emkaam waphær waphær yong ka Seinkur Suchiang Central Body.
Ya ka yalang da pynwai da u President deilang wa i kyrkhu kyrdoh ya ki para kur waroh.
