Jowai: Ka dorbar chnong Shangpung Pohshnong, West Jaiñtia Hills District haka Sngi Choh-that ka 10 tarik uni u bnai da pynkup burom ko ya u MLA yong ka, u Comingone Ymbon uwa man leh montri wa pait ya ka chtnat PWD (Building) ka sorkar jylla ha ka yalang wa pynman ha Auditorium ka chnong ryngkat i sakhi lang ki paidbah wa chong chnong nadooh ki manbei manpa ki khynroo khyllood wa ki khynnah skur.
Ha kani ka sngi najrong i pynkup burom ya u Comingone, ka chnong da chim ko leh ya ka bynta wow e Award ya ki 9 ngut ki khon ka chnong wa poi chakhmat ha ka puræ puthi wa yoh 80 percent chajrong wa ya u Dr. Damewan Suchiang uwa nyngkong dooh na Shangpung Pohshnong wa yoh yei kyrdan PhD ha ka Physic, wei da pynkup burom da ki waheh ka chnong, Secretary Chnong warim wa kiwi kiwi.
Neiliang u Comingone da dap u dei sñiawkmen hajrong i leh ka chnong yeini wei da e khublei kyrpang leh ya ki wa da kyrchaan ya oo wow man kam uwa mihkhmat, deiwa kyntu ya ki manbei manpa wow pynchlur ya ki khon ha ki puræ yong ki deiwa yooluti wa daw boon ki wow yoh ya ka Award ha ki snem wow wan.
Neitæ da kyruiñ u yei man i long ka Shangpung Pohshnong kawa nachwa man ko kawa tngit khamtam hei lyiur heiwa ym em kawi wot leh ka manyung wa em paikhana wei em ki por lada em wa sooh-ot kawi waroh yoh sooh-ot ki iwa da man kam ka khlam wei lada em wa yap bru em hadooh soo ngut wow pyndep pyndep ya ka kaam thang.
Da sñiawthooh wa kani waroh mih i nei jakhlia ka chnong wei kamwa man katni won kini ym em de ki wei ka chnong wei da ryngkat i lehkhooid ko wa kiwi tawon ki chnong.
Heijooh i por da kyntu u wa neini chakhmat toh u pynneh pynsah yei khooid wow yoh yei doh i pran wa chait wa khiah wa paka neibhah i khooid i jngiar toh ka spah bah wei lyngba i chait i khiah wow yoh i bor wow kreh chitom wow puræ wa kiwi kiwi.
Neitæ da kyntu u ya kiwa pynlai chnong wow pynman yei yachem dei langær neibynta wow pynku kynrong yei bha i miat ka chnong waroh kawi.
Discussion about this post