U Montri Rangbah ka jylla, u Conrad K Sangma ynne da pynkup burom u ya ki khloor yalehke ka Meghalaya kiwa da lehbha haka Meghalaya Games 2024 wa haka Khelo India Youth Games 2024 haka yalang wa da pynman ha U Soso Tham Auditorium, Shillong deiwa emlang u Montri ka chnat Sports & Youth Affairs, u Shakliar Warjri, ka Montri ka chnat i chait i khiah ka Ampareen Lyngdoh wa kiwi de.
U Conrad hawa e yei klam da e khublei u ya waroh kiwa da lehbha kiwa da wanrah naam yaka Meghalaya deiwa ong wa kani ka tayaaw toh kawa emkaam wei ha waroh kani ka tayaaw u leh burom ym du ya kiwa da lehbha ha ki kaam Sports tangwa wot ya kiwa seiñ khih wa kiwa em sap hei tem i put yow yoh u yachem wei wow pynyatoh wa ki khon khynroo khyllood.
Da ong u wa ini i pynkup burom toh yow pynman ya kini kiwa da lehbha yow man ki kam ka nongmuna ya kiwi u bood ki heijooh i por kam kiwa e mynsien. “Kwah oo wow khana heini wa iwa emkaam dooh ymtoh wow jop ya ki takma tangwa u man ki bru wow yahluti ha ki kaam wa bha,” da ong u Conrad.
Da yaroh u leh ya kiwa yalehbol ka jylla kiwa jop yaka Final ka Khelo India Youth Games, deiwa ong wa ini pynyoo ko yei sap wa em hapoh ka jylla wei yeini i jooh i jop ye i leh wow pynyoo ha kiwi ki jait yalehke.
Neiliang u Shakliar da pynkynmoo u ya kini kiwa yalehke kiwa da yoh yaka song poisa naka sorkar ha kani ka sngi wow pynemkaam ka dei miat neibynta i sap yong ki yow ku chooh chooh ki.
Ya kani ka song poisa da saam cha waroh kiwa yoh takma ha ki yalehke wa boon jait kiwa em 1170 ngut kawa dapoi Rs. 88.63 lak waroh.
Discussion about this post