Kiwa yalehbol ka Meghalaya kiwa da wanrah naam ya ka jylla deiwa yoh ya ka takma rupa deilang waka Kamala Gupta Trophy ha kani ka 76th National Football Championship Hero Santosh Trophy wa da pyndep ha King Fahd International Stadium ha Riyadh, Saudia Arabia ha ka 4 tarik uni u bnai wei ini da man ko ka sien nyngkong wa da yoh ka jylla wow psiah cha ka Final ha kani ka yakob yalehbol ka ri, da pynkup burom ya ki ynne ka sngi ha Shillong.
Neiliang u Montri Rangbah ka jylla, u Conrad Sangma da e khublei u leh ya kiwa yalehke ka Meghalaya wa da wanrah ki yeini i naam.
Kam wow pynkynmoo wa ka Meghalaya da rem ko da 2-3 ha ka Karnataka ha ka yalehke wa yoosuk bha.
Ka Semi Final waka Final kani ka National Championship wa da rim dooh hapoh ka ri da pynman hei sien wa nyngkong cha baar ka ri hadien wa da yasoi soskular hapyrdi ka All India Football Federation (AIFF) waka Saudi Arabia Football Federation.
Neiliang ka Department of Sports and Youth Affairs ka jylla, ynne da pynman ko ya ka Road Show yow leh burom ya kiwa yalehke ka jylla deiwa sdang na Mawlai Madan Heh heipor 2:30 i sngi deiwa lai luti na Jaiaw Jingthangbriew, Jaiaw St. Joseph, Jaiaw Langsning, Jaiaw Pdeng, Mawkhar Main Road, Motphran, Police Bazar, AG Office, Additional Secretariat, Barik, Malki Point, Dhanketi, Don Bosco Square, Laitumkhrah Beat House heiwa da em leh kiwa da mih wow pynwyrngia da ki Flash Mob ha ki 6 tylli ki thaw chwa wow pynkut ha madan Fire Brigade heipor 5:00 waje i janmiet heiwa da pynman leh ya ka yalang paidbah.
Da emlang leh awjan 50 ngut kiwa yah thuk thuk, ki Cheerleader wa ki Emcee wa yahkhmat tymbud kani ka Road Show yow pynpoor ya kani ka khubor wa bha yow em itæ i mynsien sñiawsarong ya kiwa yalehbol ka jylla.
Da em leh i tem sur wa i rwai na ki Strait Brothers waka Gracel Ropmay.
Da yoh leh yei klam wa ki kyntien pynchlur na u Montri ka chnat Sports and Youth Affairs, u Shakliar Warjri kamjooh na u President ka MFA, u Larsing Ming.
Ya kiwa yalehke da e leh da ka song poisa da ka sorkar katwa neiliang kiwa yalehke ka jylla da e ki da ka Jersy wa da dep soi da waroh kiwa yalehke cha ka chnat Sports and Youth Affairs.
Neiliang u Shakliar Warjri da yooluti u wa neini chakhmat kiwa yalehke ka Meghalaya daw yoh mynsien ki da ini i kyrdan wa da yoh kiwa yalehke ka Meghalaya yow kreh chitom chooh chooh ki wei ka sorkar daw leh ko katwa ye ko yow kyrchaan ya ki.
Da ong u leh wa ka sorkar i thong ko toh wow pynman ya ka jylla kam ka chlem wow pynheh pynsan ya kiwa em yei sap ha ki kaam yalehke la hapoh ka ri lane cha baar ri leh yow poi cha ka thong wa hakhlieh dooh.
