Jowai: Kani toh kawi na ki prokram kyrpang yong ka Dorbar Chnong Shohshrieh kawa dachim u pynman ha ka 14 tarik Wisu 2020 wei man ko leh ka sien nyngkong wa ka Dorbar Chnong chim ko u pynman kam kani ka jait prokram.
Ya kani ka sngi dawan sakhilang da u Kyrmen Shylla, Montri ka sorkar watoh u pait ya ka Social Welfare & Revenue Department Govt. of Meghalaya kam u kongsan hei emlang u Lasky Rymbai, Deputy CEM JHADC kam u symbood kongsan, u Obil Kyndait, Ex MLA-MDC, ki khon ka chnong Tuber Shohshrieh chynrang kynthai, khynnah waheh wa kiwi kiwi kiwa chah khut sñiawbha na kiwi ki chnong ki thaw.
Katkam i khanna pynsñiaw da ong wa ka thong yong kani ka prokram toh wow pynsñiawthooh ya ki manbei manpa heiyatoh wow man ki bru kiwa tip u saindur saindar ya ka manyung mansem wa ya ki khon ki kti da ka luti yong i im miat imbha wei im tipbru tipblai wei man ko leh ka prokram e mynsien ya ki khon ka chnong ka thaw kiwa daw khai daw heh ha ka mynstep man kawi.
Ha ka yalang wa yoophooh yoopheiñ yong kani ka sngi hei pynlai u K. Ksoo Waheh Chnong, da yoh yei kyntien pdiang burom na u K. Muruh, Secretary Chnong Tuber Shoshrieh katwa u Kyrmen Ksoo ha ka bynta wakut da e u ki kyntien khublei.
Wow e mynsien ya ki khon ka chnong ka thaw da yoh yei klam kyrsu kyntu, kyntien sneiñ kyntien kroo na ki manbei manpa wa da pynkup burom ha kani ka sngi kiwa kynthup ya ka Durka Ksoo, ka Moi Ksoo, u Thoin Shylla, u Joinly Ksoo, Dr. Rosina Ksoo, Dr. Madahakini Ksoo, ka Wandalang Ksoo, ka Handakaru M. Ksoo, ka Daiamonlang Ksoo wa u Ram Muruh neitæ chooh chooh da yoh leh yei klam i kappæ na u Obil Kyndait kam uwi na ki waheh wasian ka Raij Tuber wa embynta hei wow tyoor u tule yei puræ puthi hapyrdi ki khon ka raij Tuber wa na u Genesis E.Kam.
Kheinlang waroh ki khon ka chnong kiwa dachim u pynkup burom ha kani ka sngi em ki hadooh 32 ngut kynthup 19 ngut kiwa sikai katwa 13 ngut wan toh ki bru wa da pyndep ya ki kyrdan puræ waphær kam ki Doctor, Lawyer, Pulit, Engineer wa kiwi kiwi.
U Lasky Rymbai, Deputy CEM-JHADC hei e kyntien kam u symbood kongsan da pynkynmoo u hapyrdi ki khon ka chnong Tuber Shoshrieh yei emkaam yong i puræ puthi wei stat i tip ha kani ka juk ka por wa katni wei da khut kyrpaad u leh ya ki manbei manpa wow yakrehlang wa ka Dorbar Chnong neibynta wow man ka mynstep mankawi ki khon ka chnong ka thaw kawa bit wa biang watoh watne liang wanang.
U Kyrmen Shylla kam u kongsan yong kani ka sngi da yaroh u ya ka Dorbar Chnong kawa em i chynna jngai wow pynman ya kani ka prokram wei man ko leh ka nongmuna wabha ya kiwi ki chnong ka thaaiñ Khliehriat. E mynsien chooh chooh u leh ya ki khon ka chnong ka thaw kiwa em hei puræ puthi, deiwa ong, ham man ki bru wa boodiongton hi-eh yei yi iwa kiwi leh ki neibhah man da kamtæ ym ye phi u poi cha ka thong kawa mut wa mang phi. Hei pynkut yei klam, kitbok kitrwiang u ya ka Dorbar Chnong yow nangkaap nanglai ko chakhmat da ka luti yong i yatylli, yakrehlang wei yasñiawthooh yumut.
Ya kani ka sngi da pynphooh pynpheiñ wei pynchongchit da ki chaad ki rwai sur tynre wa da pynkhreh da ki khynnah skur, ki khon khynroo khyllood wa ki manbei ka chnong Tuber Shohshrieh.
Discussion about this post