Ynne ka sngi ka seiñ kiwa yalehke yaslait wa tip kam ka West Jaiñtia District Wrestling Association (WJDWA) da pynman ko ya ka yalang pynkup burom ya ki khynnah wa yoh takma ha ka lympung yalehke Meghalaya Games 2025 wa da pynman ha Yungwalieh ka Chiliangraij, Jowai heiwa u MLA ka Jowai, u Wailadmiki Shylla da man u kam u kongsan.
Ya ka WJDWA da sdang ya ka ha u Kmaichonglad (Dec) 2024 heiwa da yoh ki wow sdang pyrchang yalehke nadooh u Duyatra (Jan) 2025 wei ha ka lympung Meghalaya Games da chimbynta 18 ngut na ka seiñ heiwa da yoh ko 5 tylli ki takma wa kynthup ya 3 tylli ki takma ksiar wa 2 tylli ki takma tama.
Ya kani ka yalang da pynlai wei da yoh ya ki kyntien pdiang burom na u Vice President ka WJDWA, u Chlur Sumer uwa da khana leh ya ka parom wa tbian yong ka seiñ.
U President ka Wrestling Association of Meghalaya, u Isaiah Kharmawphlang hawa e i klam da yaroh u ya ka WJDWA wa da kreh chitom ko hanla dang sdang wot ya ka.
Da ong u leh wa emkaam u man kiwa chimkhia wei minot khnang wow yoh i tipmit ha ka ri ha i yaslait.
Kam u kongsan, u Wailadmiki da ong u wa ha ka Meghalaya Games da yachem u wa u Chief Minister wa da e laad u wow pynman ya ka lympung ha Jowai wa West Jaiñtia Hills heiwa da pynsñiaw u wa i wan ka lympung ymtoh du wow pynmiat ya ki madan wa ki Yung Dorbar tangwa wot wow pynmih biang ya ki seiñ yalehke waphær waphær.
Da ong u wa ki seiñ yalehke em ki hadooh 19-20 tylli wei da paan yarap u na u Chief Minister wow kyrchaan ya ki na ka Chief Minister Development Fund heiwa da yoh Rs.20 lak wei da yoh u e mar Rs. 1 lak kawi ka seiñ.
Chooh chooh da yooluti u wa kiwa yaslait na ka WJDWA daw ye ki wow wanrah burom ya ka District, ka jylla wot ya ka ri ha ki por wow wan.
Heijooh i por da sñiawkmen u wa da yoh ka WJDWA hadooh 5 tylli ki takma ha ka Meghalaya Games deiwa ong wa ka yaslait da em chwa ko ha i wei i bor leh da em i ha i kamtæ emkaam sei kreh chitom donhi.
Da ong u leh wa hapoh i yahkhmat u Chief Minister wa katni da kylla bak la bak heiwa ya kiwa jooh yoh takma da e du Rs. 25,000-30,000 katni won da pynku cha ka Rs. 3 lak ha jar jiar ki kyrdan.
U Wailadmiki da ong u leh wa katni dang yaleh wow yoh ya i thaw wa pura khnang wow ye kiwa yaslait u yalehke deiwa paka heiwa da ong u leh wa daw pyrchang wow wanrah ya ka lympung yaslait hapoh ka West Jaiñtia Hills.
Ha kani ka yalang da yoh leh i klam na u President ka WJDWA, u Khroo L. Pariat katwa ya ki kyntien khublei da yoh na u General Secretary ka WJDWA u Vincent Lyngdoh.
Ka WJDWA da pynkup burom ko leh ym du ya kiwa yaslait wa yoh takma tangwa kam ka dak i pynchlur da pynkup burom ko leh ya kiwi tawon kamjooh ya kiwa kitkaam ka seiñ.
Ki dkhot ka WJDWA wa kiwa yaslait yong ka da pynyoo nongmuna ki leh kammon man ka yalehke Wrestling.
Discussion about this post